Kókshetaýda joǵalǵan kópbalaly áıel tabyldy
KÓKShETAÝ. QazAqparat - Kókshetaýda úıinen ketip qalǵan kópbalaly áıel tabyldy, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.
Vedomstvonyń málimetinshe, bıylǵy jylǵy qańtardyń 13-de Kókshetaý qalalyq PB kezekshi bólimine 34 jastaǵy jergilikti turǵyn habarlasyp, úıinen belgisiz jaqqa ketip qalǵan 32 jastaǵy áıelin izdep tabýǵa kómek suraǵan.
«Osyǵan baılanysty tártip saqshylary jedel-izdestirý sharasyn qolǵa aldy. Oǵan tártip saqshylarynan bólek eriktiler de tartyldy. Kókshetaý qalasyndaǵy barlyq beınebaqylaý kameralarynyń beınejazbalary tekserilip, áıeldiń týystary men tanystary suraldy», - dedi vedomstvodan.
Belgili bolǵandaı, áıeldiń kámeletke tolmaǵan tórt balasy bar. Ol qańtardyń 12-de túngi saǵat 23:30-dar shamasynda úıinen shyǵyp ketken.
«Arada bir kún ótken soń áıeldi tártip saqshylary tapty. Ol otbasylyq máselege baılanysty úıinen ketip, jalǵyz bolǵysy kelgen», - dep tolyqtyrdy vedomstvodan.
