Kókshetaýda joǵalǵan kámelet jasyna tolmaǵan stýdent qyzdar aman tabyldy
KÓKShETAÝ. QazAqparat – Aqmola oblysynda jataqhanadan qashyp ketken kámelet jasynfa tolmaǵan stýdent qyzdar tabyldy, dep habarlaıdy QazAqparat tilshisi.
Oblystyq polıtsııa departamenti baspasóz qyzmetiniń málimetinshe, mamyrdyń 19-da saǵat 17:38-de Kókshetaý qalalyq polıtsııa basqarmasynyń kezekshi bólimine jergilikti kolledj dırektorynyń orynbasary júgingen.
Onyń aıtýynsha, bir kún buryn kolledj jataqhanasynan 1-kýrstyń eki stýdenti 17 jáne 15 jastaǵy qyzdar joǵalyp ketken.
Buǵan deıin bul stýdentter jataqhanadan óz erkimen shyqpaǵan.
«Jedel-izdestirý sharalaryna 30-dan astam polıtsııa qyzmetkeri qatysty. Nátıjesinde, jeti saǵattyq izdeýden keıin polıtsııa qyzdardyń qaıda ekenin anyqtaı aldy. Olar Kókshetaý qalasyndaǵy saıajaı kooperatıvteriniń birinde dostarymen bolǵan. Kámeletke tolmaǵandarmen profılaktıkalyq áńgime júrgizildi» dep atap ótti vedomstvodan.
Osy rette tártip saqshylary turǵyndarǵa kámeletke tolmaǵandardyń zańdy ókilderi balalarǵa qaýipsizdik sharalary týraly únemi túsindirip, olardy uıaly baılanys quraldarymen qamtamasyz etý kerektigin eske salady.
«Jasóspirimdermen senimdi qarym-qatynas ornatý, olardyń qarym-qatynas sheńberin bilý, jastyq máselelerine kóńil bólý, balanyń minez-qulqynyń ózgerýine nazar aýdarý kerek» dep eskertedi polıtsııa.
