Kókshetaýda joǵalǵan kámelet jasyna tolmaǵan qyz tabyldy
KÓKShETAÝ. QazAqparat - Kókshetaý qalasynda joǵalyp ketken kámeletke tolmaǵan qyzdy polıtsııa izdep tapty, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, bıylǵy jylǵy mamyrdyń 21-de saǵat 23:30-da Kókshetaý qalalyq PB «102» pýltine 39 jastaǵy er adam habarlasyp, 15 jastaǵy qyzyn izdep tabýǵa kómek surady. Ákesiniń sózinshe, qyzy 21 mamyrda saǵat 19:00 shamasynda úıden ketip, keıin qaıtyp oralmaǵan.
«Ákesi qyzy serýendep bolǵan soń, úıge oralady dep úmittengen, biraq olaı bolmaı shyqty. Polıtsııa qyzmetkerleri dereý izdestirý sharalaryn uıymdastyrdy. Oǵan qylmystyq izdestirý qyzmetkerleri, ýchaskelik polıtsııa ýákilderi jáne ıývenaldy polıtsııa ınspektorlary jumyldyryldy. Tártip saqshylary barlyq mańaıdy tekserip, joǵalǵan adamnyń týǵan-týystarynan surastyryp, onyń áleýmettik ortasyn zerttedi. Kókshetaý qalasynyń barlyq beınebaqylaý kameralaryndaǵy jazba tekserildi», - dedi vedomstvodan.
Júrgizilgen jumystyń nátıjesinde jasóspirimniń Kókshetaý qalasynyń kósheleriniń birinde júrgeni anyqtalyp, polıtsııa bólimine jetkizildi.
Aıta ketý kerek, jasóspirimge qatysty qandaı da bir zańsyz áreketter jasalmady. Kámeletke tolmaǵandar isi jónindegi bólim qyzmetkerleri qyzben áńgime ótkizdi. Polıtsııa azamattardan balalaryna muqııat bolýdy jáne olardy qaraýsyz qaldyrmaýdy, sondaı-aq árqashan ortaq til tabýǵa tyrysýdy suraıdy.
Sondaı-aq, tártip saqshylary jaqyn týystarynyń biri joǵalǵan jaǵdaıda dereý kómek surap, óz betinshe izdeýge ýaqyt jumsamaý kerektigin aıtady.
