Kókshetaýda joǵalǵan 4 jasar bala ashyq káriz qudyǵynan tabyldy
ASTANA. KAZINFORM — Kókshetaýda joǵalyp ketken 4 jastaǵy bala ashyq turǵan káriz qudyǵyna túsip, kóz jumǵan, dep Kazinform agenttiginiń óńirdegi tilshisi habarlady.
8 qazanda Kókshetaý turǵyndaryn eriktiler taratqan 4 jastaǵy balany izdeýge arnalǵan habarlandyrý alańdatty. Bala sol kúni Kókshetaýdaǵy Áshımov kóshesi, 223-úı mekenjaıynan shyǵyp ketken. Habarlandyrýda balanyń durys sóıleı almaıtyny kórsetilgen.
Keıin balanyń sýǵa batyp ketkeni týraly aqparat tarady. Aqmola oblysy Polıtsııa departamentiniń baspasóz qyzmeti bul aqparatty rastady.
— 2026 jylǵy 8 qazanda Kókshetaý qalasynda kámeletke tolmaǵan balanyń joǵalǵany týraly kezekshi bólimge habarlama tústi. Іzdeý jumystaryna polıtsııa men Tótenshe jaǵdaılar departamentiniń kúshteri jumyldyryldy. Іzdestirý barysynda bala ashyq turǵan qudyqtan tabyldy. Aldyn ala málimet boıynsha, zorlyq-zombylyq belgileri anyqtalǵan joq, — dep habarlady vedomstvo.
Polıtsııa atalǵan fakti boıynsha qylmystyq is qozǵady. Qazir oqıǵanyń mán-jaıy anyqtalyp jatyr, tıisti tekserý júrgizilýde. Tergeý múddesine jáne derbes derekterdi qorǵaýǵa baılanysty ózge aqparat jarııalanbaıdy.
Kókshetaýdaǵy atalǵan mekenjaıda birneshe uıym men ortalyq ornalasqan. Solardyń birinde Kazinform tilshisine balanyń bul jerden anasynan qashyp shyǵyp ketkeni aıtyldy.
