Kókshetaýda jylý elektr ortalyǵyn salý qalaı júrip jatyr – ákim jaýaby

ASTANA. KAZINFORM – Bıyl Aqmola oblysynda jylytý maýsymy daıyndyǵyna 40 mlrd teńge bólindi, onyń ishinde alǵash ret menshik ıeleri esebinen 8 mlrd teńgege jylý jelileri jóndeldi. Bul týraly óńir ákimi Marat Ahmetjanov málim etti.

- Bıyl Stepnogorsk qalasynda 8 shaqyrym jylý jeli jóndeldi, bul jelilerdiń tozýyn 73%-ǵa tómendetýge múmkindik berdi. Osy sekildi Atbasarda da jumys júrgizildi, qaladaǵy jylý jelisiniń tozýy 70%-ǵa tómendedi. Jylý jelileri boıynsha josparlanǵan jumystar 100% oryndaldy, - dedi Marat Ahmetjanov óńirdiń áleýmettik-ekonomıkalyq damý barysy týraly esep bere turyp. 

Odan ári oblys ákimi Kókshetaýda jylý elektr ortalyǵyn (JEO) salý jumysynyń barysyna toqtaldy. 

- Bul baǵytta belsendi jumys júrip jatyr. Qazir ınjenerlik-geologııalyq izdestirý jáne ýaqytsha qurylystarǵa arnalǵan alańdy uıymdastyrý jumystary bastaldy. Turaqty jáne sapaly sýmen qamtamasyz etý máselesine erekshe nazar aýdarylyp otyr. Bul maqsatqa bıyl 34 mlrd teńgeden astam qarjy bólindi, - dep tolyqtyrdy ol. 

Sondaı-aq ákim esep berý barysynda Egindikól aýdanynda 70 shaqyrymdyq Nura toptyq sý qubyry jelisi salynǵanyn málim etti. 

- Jańa jeli Qarǵaly, Janteke, Qumkól, Egindikól jáne Toǵanas aýylyn sýmen qamtamasyz etip otyr. Sol sııaqty bıyl Úkimet rezervinen Egindikól jáne Qorǵaljyn aýdandaryna sý tartqyshty qaıta jańartýǵa qosymsha qarajat bólindi. Bul shara eki aýdan turǵyndaryn taza aýyz sýmen úzdiksiz qamtamasyz etedi. Odan bólek Kókshetaý qalasynda sý tazartý qurylysy jobasy aıaqtalý satysynda tur. Jeltoqsanda qurylys-montaj jumystaryn aıaqtaımyz dep otyrmyz, - deıdi M. Ahmetjanov.