Kókshetaýda jylytý maýsymy bastaldy

KÓKShETAÝ. KAZINFORM – Kókshetaý qalasyndaǵy barlyq áleýmettik nysan men turǵyn úıge jylý berildi. 

Qala ákimdiginiń málimetinshe, jylytý maýsymy 25 qyrkúıekke deıin iske qosyldy jáne birinshi kezekte mektepter, balabaqshalar, densaýlyq saqtaý nysandaryna jylý berildi. Keıin kópqabatty úıler, áleýmettik nysandar qosyldy.

Jalpy «Kókshetaý jylý» kommýnaldyq kásipornynyń RK-1 jáne RK-2 qazandyqtary oblys ortalyǵyndaǵy 5 182 nysandy jylytady, onyń 1 401-i áleýmettik nysandar, al qalǵandary turǵyn úıler, ónerkásip nysandary jáne ózge de uıymdar. 

«2024-2025 jyldardaǵy jylytý maýsymyna daıyndyq sheńberinde QR Úkimetiniń rezervinen jalpy somasy 1 375 mln teńgege qarajat bólindi, onyń 816 mln teńgesi jylý kózderin, ıaǵnı RK-1 eki bý qazandyǵyn jóndeý jáne RK-2 №8,9,10 shań-kómir qazandyqtaryn jóndeýge arnaldy. Al 559,029 mln teńge uzyndyǵy 6 km bolatyn jylý jelilerin jóndeýge baǵyttaldy», - dedi ákimdikten. 

Aıta ketsek, budan buryn Kókshetaýda jylý tarıfi kimder úshin jáne qanshalyqty ózgeretinin jazǵan edik.