Kókshetaýda jergilikti halyqqa qajet azyq-túlik qory jetkilikti – ákimdik

KÓKShETAÝ. QazAqparat - Kókshetaý qalasy ákiminiń orynbasary Eldar Ábýev pen «Aqmola - adaldyq alańy» jobalyq keńsesiniń basshysy Samıra Taıtenova «Antikor ortalyǵy» servıs ortalyǵynda tikeleı efırge qatysty, dep habarlaıdy QazAqparat tilshisi Sybaılas jemqorlyqqa qarsy is-qımyl agenttigi Aqmola oblysy boıynsha departamentiniń baspasóz qyzmetine silteme jasap.

Qala basshysynyń orynbasary SOVID-19 vırýsynyń taralýymen baılanysty eldegi tótenshe jaǵdaı kezinde halyqty azyq-túlik taýarlarymen qamtamasyz etý jumysy týraly aıtyp berdi.

Eldar Ábýevtiń aıtýynsha, qazirgi ýaqytta aımaq turǵyndaryn áleýmettik mańyzdy azyq-túlik taýarlarymen úzdiksiz qamtamasyz etý boıynsha barlyq qajetti sharalar qabyldanýda. Agrarlyq azyq-túlik naryǵyna retteýshilik yqpal etý jáne azyq-túlik qaýipsizdigin qamtamasyz etý maqsatynda oblys aýmaǵynda azyq-túlik taýarlarynyń óńirlik turaqtandyrý qory jumys isteıdi. Sondaı-aq, qazirgi tańda birinshi kezekte qajetti taýarlardy jetkizýdi júzege asyratyn avtokólikterdiń tizimin jınaý boıynsha jumystar júrgizilýde. Sonymen qatar, ákimdik aımaqta azyq-túlik taýarlaryn óndiretin kásiporyndarǵa jan-jaqty qoldaý kórsetýde.

Spıkerdiń aıtýynsha, halyqtyń tynys-tirshiligin qamtamasyz etýge arnalǵan qorlar jetkilikti mólsherde bar. «Qamqor» kommýnaldyq bazarynda ornalasqan «Esil» áleýmettik kásipkerlik korporatsııasynyń pavılonynda azyq-túlik taýaralaryn satyp alýǵa bolady.

Áleýmettik mańyzy bar azyq-túlik taýarlaryna baǵa monıtorıngi jáne óńirlik turaqtandyrý qoryn qalyptastyrýǵa qatysty «Esil» ÁKK qyzmetiniń monıtorıngi nátıjeleri týraly Samıra Taıtenova aıtty.

Júrgizilgen monıtorıng barysynda jumys toby áleýmettik mańyzy bar azyq-túlik taýarlary ruqsat etilmeıtin aýqymda satylatynyn anyqtady. Monıtorıng qorytyndysy boıynsha taldaý anyqtamasy jasaldy, ol baǵany negizsiz kóterýge monopolııaǵa qarsy den qoıý sharalaryn qabyldaý úshin tıisti organdarǵa jiberildi.

Belgili bolǵandaı, aǵymdaǵy jyldyń 31 naýryzynan Kókshetaý qalasy jabylǵan sátten bastap barlyq bıznes nysandar óz qyzmetin toqtatty. Buǵan azyq-túlik dúkenderi men dárihanalar kirmeıdi. Olardyń jumysy sanıtarlyq jáne dezınfektsııalyq sharalardy mindetti túrde saqtaı otyryp, shtattyq rejımde jalǵastyryldy. Qalada barlyǵy 515-ten astam azyq-túlik saýda oryndary jumys isteıdi, bul - dúkender, bazarlar, gıpermarketter, sýpermarketter.