Kókshetaýda JEO salýǵa qatysty tehnıkalyq-ekonomıkalyq negizdeme daıyn
NUR-SULTAN. QazAqparat – Kókshetaý qalasynda jylý elektr ortalyǵyn salýǵa qatysty tehnıkalyq-ekonomıkalyq negizdeme daıyn. Bul týraly óńir ákimi Ermek Marjyqpaev óńirdegi mal basy artqanyn málim etti, dep habarlaıdy QazAqparat tilshisi.
«Birazdan beri oblys ortalyǵyn sýmen qamtamasyz etý men elektr energııasynyń generatsııasy turǵyndardy alańdatyp otyr. Qala damyp keledi, shahar aýmaǵy keńeıip jatyr. Sonymen qatar bıznes damyp, áleýmettik sala nysandary salynyp jatyr. Alaıda bizde jylýmen qamtamasyz etý kózine baılanysty problema bar», - dedi ákim Ortalyq kommýnıkatsııalar qyzmetinde.
Osy oraıda ol 2014 jyly Kókshetaýda jylý elektr stansasyn salýǵa tehnıkalyq-ekonomıkalyq negizdeme tapsyrylyp, daıyndalǵanyn eske saldy.
«Konkýrs júrgizilip, 25-ten astam kompanııadan ótinim kelip tústi. Olardyń arasynda sheteldik kompanııalar da boldy. Biraq konkýrsta jeńgen kompanııa ózine alǵan ókilettikti oryndaı almady. Bizge Memleket basshysy jylý elektr ortalyǵyn salý boıynsha tikeleı tapsyrma berdi. Sondyqtan Úkimetpen birlese otyryp, bul máseleni pysyqtap jatyrmyz. Ótken aptada jylý elektr ortalyǵynyń tehnıkalyq-ekonomıkalyq negizdemesin aldyq. Onda birshama parametr ózgerdi. Bul joba aıtarlyqtaı jetildirildi, zamanaýı tehnologııalarǵa qatysty eleýli jumys júrgizildi, ıaǵna ekologııa baǵytyna ekpin qoıyldy», - dedi Ermek Marjyqpaev.
Osy oraıda ákim JEO salynsa qaladaǵy ystyq sý máselesi de sheshiletinin aıtty.
Onyń sózine qaraǵanda, jylýmen jabdyqtaý salasynda, ótken jyly jylý kózderi men jylý toraptaryn salý men rekonstrýktsııalaýdyń 9 jobasyn iske asyrý nátıjesinde, 61 kópqabatty turǵyn úı, 454 jekemenshik úı, 31 áleýmettik obekt jylýǵa qosymsha qosyldy. Sonymen qatar, Aqkól (Aqkól q.), Astrahan, Býrabaı, Ereımentaý, Bulandy, Tselınograd (Aqmol a.) aýdandarynda jáne Kókshetaý qalasynda shamamen 11 myń adam sapaly jylýmen qamtamasyz etildi.
«Aǵymdaǵy jyly jumys jalǵastyrylatyn bolady. Stepnıak qalasy, Aqmol aýyly, Makınsk qalasy, Astrahanka aýyly jáne oblys ortalyǵynda qazandyqtar men jylý toraptaryn salyp jóndeýdi josparlap otyrmyz. Jalpy, 9 myń halyqty qamtý arqyly 10 joba bar», - dedi ákim.
