Kókshetaýda JEO qurylysynyń orny anyqtaldy
KÓKShETAÝ. KAZINFORM — Kókshetaýda JEO qurylysynyń orny anyqtaldy. Bul týraly Aqmola oblysynyń ákimi Marat Ahmetjanov BAQ ókilderimen ótken brıfıngte málim etti.
Ótken jyly Qazaqstan jáne Reseı Úkimetteriniń arasynda elimizdiń úsh qalasynda JEO salý jóninde memorandýmǵa qoıyldy, sony biri — Kókshetaý qalasynda.
«Qurylys alańy qazirdiń ózinde anyqtaldy, onyń aýdany 120 gektar. Biz ony RK-1 jáne RK-2 jylý qazandyqtarynyń janynan salýdy josparlap otyrmyz. Oǵan arnalǵan jer áldeqashan bólingen. Ol jerdi tańdaǵan sebebimiz, JEO jumysyn bastaǵan kezde qazirgi qazańdyqtar kómekshi bolady» — dep túsindirdi oblystyq energetıka jáne turǵyn úı-kommýnaldyq sharýashylyǵy basqarmasynyń basshysy Danııar Qýanyshbaev.
Aımaq basshysy JEO-nyń Kókshetaý qalasynyń damýyna paıdasy zor bolatynyn aıtady.
«Búginde bizde jylý men elektr energııasynyń tapshylyǵy bar. Ótken aptada biz jınalys ótkizdik. Jylý jáne elektr energııasynan basqa, JEO bizge qosymsha jumys oryndaryn beredi, ıaǵnı óndirisimiz jandana túsedi. Basymdyq jergilikti materıaldar men jergilikti jumys kúshine beriledi, bul óńirde óndiristiń damýyna serpin beredi» — dedi Marat Ahmetjanov.
Sondaı-aq, ol JEO salý arqyly kókshetaýlyqtar arıston qoldanýdan qutylatynyn atap ótti.
«Bizdiń esebimiz boıynsha Kókshetaý qalasynyń turǵyny sýdy jylytý úshin orta eseppen aıyna 5-10 myń teńge aqsha jumsaıdy. Eger sý ystyq bolsa, onda elektr energııasy da bólinedi. Endi biz halyqqa osyny túsindirýimiz kerek. Qazir bir ǵana sýyq sý qubyry bar, JEO salǵanda ystyq sýǵa taǵy bir qubyr qajet bolady, ıaǵnı jańartý jumystaryn júrgizý kerek. Esesine turǵyndar jyl boıyna ystyq sýdy paıdalana alady» — dep túıindedi ákim.
Aıtýynsha, JEO keıin gazǵa aýystyrýǵa bolatyndaı etip salynbaqshy, ıaǵnı ekologııalyq talaptar saqtalady. Qurylys zamanaýı tehnologııalar men standarttar boıynsha júrgiziledi jáne 2,5 ese kóp jylý óndirýge múmkindik beredi.
Aıta ketsek, budan buryn «Samuryq-Energo» AQ Kókshetaýda jylý elektr ortalyǵyn salatynyn jazǵan edik.
Aslan Ospanov.
