Kókshetaýda JEO qurylysy boıynsha jumystar bıyl bastalady
KÓKShETAÝ. KAZINFORM - Kókshetaýda JEO qurylysy boıynsha jumystar bıylǵy jyldyń úshinshi toqsanynda bastalady. Bul týraly aımaq basshysy Marat Ahmetjanovtyń «Samuryq-Energo» AQ ókilderimen ótkizgen keńeste aıtyldy.
Ákimdiktiń baspasóz qyzmetiniń málimetinshe, jıynda Kókshetaý qalasynda JEO qurylysynyń jobasyn iske asyrý máseleleri talqylandy. Óńir basshysy oblys ortalyǵyn jylýmen qamtamasyz etý strategııalyq mańyzdy máselelerdiń biri ekenin atap ótti.
«Memleket basshysynyń tapsyrmasyn oryndaý aıasynda JEO qurylysyna erekshe kóńil bólinedi. Biz barlyq kúsh-jigerimizdi salyp, jobany ýáde etilgen merzimde iske asyrýymyz kerek», - dedi M.Ahmetjanov.
Sonymen birge, jıynda «Samuryq-Energo» AQ basqarma tóraǵasy Qaırat Maqsutov keńeske qatysýshylardy jobalyq jumystardyń bastalýy jáne jobany iske asyrý jóninde aldaǵy josparlar týraly habardar etti.
Qazaqstan Respýblıkasy Úkimetiniń tapsyrmasyna sáıkes «Samuryq-energo» AQ-men JEO qurylysynyń tehnıkalyq-ekonomıkalyq negizdemesin ózektendirý rásimi bastaldy jáne «Kókshetaý JEO» JShS quryldy.
«INTER RAO-Eksport» JShQ-men jobalaý-smetalyq qujattamany ázirleýge kelisimshart jasasý kelisý satysynda, jer ýchaskesin bólý jáne bastapqy derekterdi jınaý máselesi pysyqtalýda.
Daıyndyq jumystaryn, atap aıtqanda aýmaqty qorshaý, kirme joldardy salý jáne ınjenerlik izdenisterdi bıylǵy jyldyń 3-toqsanynda bastaý josparlanyp otyr.
Aıta ketsek, osy jyldyń sáýir aıynda Qazaqstan Respýblıkasynyń Úkimeti men Reseı Federatsııasynyń Úkimeti arasynda Kókshetaý qalasynda jylý elektr ortalyqtaryn salý jobalary týraly kelisim jasalǵan bolatyn. Qyzmetti úılestirý eki eldiń Energetıka mınıstrligine júktelgen. Ýákiletti uıymdar «Samuryq-Energo» AQ jáne «INTER RAO – Eksport» JShQ bolyp belgilendi.
Eske salaıyq, budan buryn bıyl Kókshetaýda JEO qurylysy bastalatanyn jazǵan edik.
