Kókshetaýda Jeńis kúni qarsańynda qalalyq gazetterdiń júldesi sarapqa salyndy
KÓKShETAÝ. QazAqparat - Kókshetaýda Uly Jeńistiń 71 jyldyǵy men 7 mamyr Otan qorǵaýshy kúni qurmetine qalalyq «Kókshetaý» jáne «Stepnoı maıak» gazetteriniń júldesi úshin dástúrli jeńil atletıkadan estafeta ótti.
Estafetanyń ashylý saltanatyna qatysqan Kókshetaý qalasynyń ákimi Ermek Marjyqpaev pen sport ardageri Ábdirahman Ábdirashıtov Táýelsizdik alańyna jınalǵandardy quttyqtap, komanda múshelerine jeńis tiledi.
«Oblys ortalyǵynda jeńilatletıkalyq estafeta osydan 69 jyl buryn bastaý alǵan bolatyn. Sodan beri jyl saıyn ótkizilip keledi. Osynaý ıgi shara jetkinshekter men jastardyń jeńil atletıkaǵa degen qumarlyǵyn odan saıyn arttyra túsedi», dedi qala ákimi.
Jalpy, bul jolǵy jeńilatletıkalyq estafetaǵa Kókshetaý qalasyndaǵy joǵary, arnaıy orta oqý oryndarynyń stýdentteri men mektep oqýshylary, kásiporyndar men uıymdardyń qyzmetkerlerinen quralǵan 800-ge jýyq adam qatysyp, baqtaryn synady.
Onyń ishinde qyzdar arasynda ótken estafeta da komandalyq esep boıynsha joǵary oqý oryndarynyń arasynda Sh.Ýálıhanov atyndaǵy Kókshetaý memlekettik ýnıversıtetiniń qurama komandasy birinshi, A.Myrzahmetov ýnıversıtetiniń komandasy ekinshi orynǵa turaqtady. Al, erler arasynda Kókshetaý tehnıkalyq ınstıtýtynyń komandasy birinshi oryn alsa, júldeli ekinshi jáne úshinshi oryndardy Sh.Ýálıhanov atyndaǵy Kókshetaý memlekettik ýnıversıteti men A.Myrzahmetov ýnıversıtetiniń komandalary ózara bólisti.
Estafetaǵa qatysýshylar kýbok, gramota, dıplommen jáne baǵaly syılyqtarmen marapattalatyn bolady.
