Kókshetaýda jemqorlyqpen kúreske baǵyttalǵan komedııanyń tanystyrylymy ótti
Osy maqsatta Kókshetaýda I.Ilf pen E.Petrovtyń «Zolotoı telenok» romanynan alynǵan «Uly kombınator» atty komedııalyq-satıralyq qoıylymynyń tusaýkeseri ótti.
Sharany QR Sybaılas jemqorlyqqa qarsy 2015-2025 jyldarǵa arnalǵan strategııany júzege asyrý maqsatynda Aqmola oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamenti uıymdastyrdy.
Aqmola oblystyq orys drama teatry ártisteri somdaǵan qoıylym adamdy tolǵandyratyn, jemqorlyq pen qaǵazbastylyq sııaqty nárselerdi kelemejdeıtin komedııalyq-satıralyq kórinisterge toly boldy.
Sybaılas jemqorlyqqa qarsy mádenıetti jáne quqyq buzýshylyqtardyń barlyq túrlerine múldem tózbeýshilik qaǵıdatyn qalyptastyrý sheńberinde uıymdastyrylǵan sharaǵa Aqmola oblysynyń ákimdigi qoldaý bildirgen.
Qoıylym óziniń tereń maǵynasymen adamzattyń adaldyǵyn, adamgershiligin, tálim-tárbıesi men rýhanı mádenıetin arttyrýǵa, óz áreketteri úshin jaýapkershiligin qalyptastyrýǵa baǵyttalǵan. Jemqorlyqpen kúresýdiń osynaý ádisi boıynsha Departament basshysy Bergen Bespalınov ta óz oıyn bildirdi.
«Árbir quqyq buzýshylyq uıat, mádenıetimiz úshin jat nárse retinde qabyldanýy tıis. Jemqorlyqpen kúresý ádisteriniń ártúrli ekeni belgili. Bizdiń oıymyzsha, satıra men ázil arqyly jemqorlyqty kelemejdeý jaqsy nátıje kórsetýi tıis», dep atap ótti B.Bespalınov.
Orys drama teatrynyń dırektory Beıbit Baqtygereevtiń aıtýynsha, ártister quramy kórermenderdiń úmitterin aqtap, tek quqyqtyq qana emes, sonymen birge rýhanı-adamgershilik turǵyda tyıym salynǵan qubylys retinde sybaılas jemqorlyqtyń shynaıy mazmunyn ashty. Qoıylym mádenıet salasynyń úzdigi, qoıýshy-rejısser Olga Lýtsıva men akterler quramynyń arqasynda joǵary deńgeıde ótti.
Qoıylym qarasha aıynyń 4-23 kúnderi aralyǵynda usynylatyn bolady.
Aıta keteıik, osyǵan deıin Elbasynyń Joldaýyndaǵy mindetterdi júzege asyrý sheńberinde Aqmola oblysynda jemqorlyqqa qarsy jańa joba qolǵa alynatynyn habarlaǵan edik.