Kókshetaýda jemqor basshyǵa sot úkimi shyqty
KÓKShETAÝ. QazAqparat - Kókshetaý qalalyq soty sybaılas jemqorlyq jasady dep aıyptalǵan qalalyq Memlekettik kirister basqarmasy basshysynyń burynǵy orynbasaryna qatysty qylmystyq isti qarady, dep habarlaıdy "QazAqparat" HAA tilshisi oblystyq sottyń baspasóz qyzmetine silteme jasap.
Sot anyqtaǵandaı, Memlekettik kirister basqarmasy basshysynyń burynǵy orynbasary azamat R-dan 300 myń teńge somasynda para alǵan. Jergilikti sheneýnik oǵan ákimshilik jaýapkershilikten bosatýǵa jáne QQS boıynsha tirkeý esebine qoımaýǵa ýáde etken.
"Sot úkimimen Memlekettik kirister basqarmasy basshysynyń burynǵy orynbasary QR Qylmystyq kodeksiniń 366-babynyń 2-bóligimen («Para alý») kináli dep tanylyp, oǵan múlkin tárkileýmen, polıtsııa maıory ataǵynan aıyrýmen, memlekettik qyzmette laýazymdyq qyzmetin atqarý quqyǵynan ómir boıyna aıyrýmen 4 500 000 teńge kóleminde aıyppul túrindegi jaza taǵaıyndaldy.
Sot úkimi zańdy kúshine engen joq", - dep kórsetilgen habarlamada.
