Kókshetaýda jekemenshik fırma bazasynda ındýstrıaldyq aımaq qurylmaq
KÓKShETAÝ. QazAqparat - Kókshetaý qalasyndaǵy «Qamqor-Avtoservıs» JShS óńirdegi shaǵyn jáne orta bıznes úshin donor bolýǵa nıetti, dep habarlaıdy QazAqparat tilshisi.
Aqmola oblystyq kásipkerlik palatasy baspasóz qyzmetiniń málimeti boıynsha, óńirde kásipkerlik salasynyń damýyna qolaıly jaǵdaı qalyptastyrý maqsatynda jekemenshik ındýstrıaldyq aımaǵyn qurýdy qolǵa alyp otyr. Mundaǵy maqsat shaǵyn jáne orta bıznes sýbektilerine jeńildetilgen baǵamen usynylatyn ınjenerlik ınfraqurylymmen qamtamasyz etilgen óndiristik alańdar tabý.
Osy oraıda, shaǵyn jáne orta bıznes úshin donor bolýǵa laıyq «Qamqor-Avtoservıs» JShS-na tańdaý túsip otyr.
«Qazirgi kezde bul kásiporynmen áriptestik jóninde memorandýmǵa qol qoıyldy. Seriktestik jalǵa alań usynýǵa daıyn. Osymen qatar, biz jalǵa alýshylardy izdestirip jatyrmyz. Osy kúni biraz kásipkerler bizdiń usynysymyzdy qolǵa alyp otyr. Bizdiń mundaı qadamǵa barýymyzǵa kóptegen adamdardyń kásipkerlikpen aınalysýǵa óndiristik alańdardyń joqtyǵy týraly túsken ótinishteri sebep boldy», - deıdi Aqmola oblystyq kásipkerler palatasynyń bólim basshysy Janna Baıqońyrova.
Kezinde «Qamqor-Avtoservıs» JShS avtokólikterge tehnıkalyq qyzmet kórsetetin jáne satýmen aınalysatyn óńirdegi iri kompanııalardyń biri sanalady. Búginde kásiporynnyń myńdaǵan sharshy metr óndiristik alańdary bos tur. Sondyqtan, seriktestik basshylyǵy bos alańdardy jalǵa berýge daıyn.
«Biz óńirlik kásipkerler palatasymen birlesip, jekemenshik ındýstrıaldyq aımaq qurýdy josparlap otyrmyz. Óndiristik alańdaǵy oryndardy jalǵa jeńildetilgen baǵamen usynamyz. Bizdiń óndiristik alańnyń artyqshylyǵy, ol Kókshetaý qalasynyń kóliktik logıstıkasy damyǵan jerinde ornalasýynda bolyp otyr. Alańda temirjol, avtojol jáne kommýnıkatsııanyń barlyq júıesi tartylǵan. Bul shaǵyn jáne orta bıznes ókilderi úshin utymdy», - deıdi seriktestik dırektory Sáken Táńirqulov.
Bul óńirlik kásipkerler palatasy qolǵa alyp otyrǵan jalǵyz ǵana joba emes, aldaǵy ýaqytta Tselınograd aýdanynda «Asyl túlik» JShS bazasynda da osyndaı ındýstrıaldyq aımaq qurý josparda bar.
