Kókshetaýda jataqhanadaǵy órtten 120 adam evakýatsııalanyp, 1 adam mert boldy
KÓKShETAÝ. QazAqparat - Kókshetaýda jataqhana órtenip, bir adam kóz jumdy. Sondaı-aq, 120 adam (onyń 25 bala) evakýatsııalanyp, 30 adam (onyń 14 bala) qutqaryldy, dep habarlaıdy QazAqparat tilshisi Aqmola oblystyq TJD baspasóz qyzmetine silteme jasap.
Vedomstvonyń málimetinshe, tótenshe jaǵdaı búgin túnde, ıaǵnı, 17 aqpan kúni saǵat 02:10 shamasynda Nazarbaev dańǵylyndaǵy 27-shi úıdegi № 401 páterde bolǵan. Tilsiz jaýdy aýyzdyqtaýǵa TJD jeke quramynan 43 qyzmetkeri men 12 órt sóndirý tehnıkasy, jedel járdem qyzmeti brıgadasynyń 25 qyzmetkeri men 9 tehnıkasy, Kókshetaý qalalyq PB jedel-tergeý tobynyń 15 qyzmetkeri men 5 tehnıkasy tartyldy. 5 qabatty, 85 páterli jataqhananyń 4 qabatyndaǵy páterden shyqqan órttiń aýmaǵy 15 sharshy metrdi qurady.
«Órtten 120 adam (onyń 25-i bala) evakýatsııalanyp, 30 adam (onyń 14-i bala) qutqaryldy. Órt sóndirýshiler jetkenshe, Aqmola oblystyq kópbeıindi aýrýhanasyna 3 adam jetkizildi. Olardyń arasynda pyshaq jaraqatyn alǵan 1985 jylǵy er adam aýrýhanada kóz jumdy. Al, 1981 jylǵy áıeldiń oń qolynda pyshaq jaraqaty bar, 2000 jylǵy áıelge ıis tıgen. Sońǵysynyń jaǵdaıyn dárigerler ortasha aýyr dep otyr», deıdi vedomstvodan.
TJD qyzmetkerleri atap ótkendeı, sonymen qatar, ystan ýlanǵan 2000 jylǵy er adam (jaǵdaıy ortasha aýyr) men 1963 jylǵy áıel (aty - jóni anyqtalý ústinde, jaǵdaıy óte aýyr) Kókshetaý qalalyq aýrhanasyna jatqyzyldy.
Qazirgi kezde órttiń sebep-saldary anyqtalý ústinde.
