Kókshetaýda jastar kúnine arnalǵan aýqymdy mereke ótti
KÓKShETAÝ. KAZINFORM – Kókshetaýdaǵy Jańa Jaǵalaý aýmaǵynda sportty, ekologııalyq bastamalardy, IT-tehnologııalardy jáne kóshe mádenıetin biriktirgen «Aqmola Jastar Day — 2026» jastar open air-y ótti.
Aýqymdy sharaǵa qala turǵyndary men qonaqtary qatysyp, jastarǵa arnalǵan túrli alańdarda belsendi ýaqyt ótkizdi.
Merekelik baǵdarlama dástúr boıynsha paıdaly ispen bastaldy. Qalalyq jaǵalaýda respýblıkalyq «Taza Qazaqstan» aktsııasy aıasynda Eco Plogging uıymdastyrylyp, oǵan 160-tan astam stýdent, volonter, bloger jáne belsendi qatysty. Qatysýshylar dene belsendiligin qorshaǵan ortaǵa qamqorlyqpen ushtastyryp, aýmaqtan 200-den astam qap qurǵaq qoqys jınady.
Tústen keıin jaǵalaýda negizgi taqyryptyq alańdar jumysyn bastady. Salaýatty ómir saltyn ustanatyn jastar Aqmola oblysynyń jaǵajaı voleıbolynan chempıonatynda baq synap, ulttyq asyq atýdan óz mergendikterin synady. Al Future Zone ınteraktıvti alańy qala turǵyndaryn zamanaýı tehnologııalarmen tanystyrdy.
— Búginde memleket jastarǵa bilim alýǵa, jańa tehnologııalardy meńgerýge jáne óz bastamalaryn júzege asyrýǵa keń múmkindik jasap otyr. Bizdiń mindetimiz — jastardyń osy áleýetin qoldap, olardyń bilimi, ıdeıasy men energııasy óńir men eldiń damýyna eleýli úles qosýyna jaǵdaı jasaý, — dep atap ótti Aqmola oblysy ákiminiń orynbasary Dosýlan Aıtbaev.
Іs-sharada bilim berý men tsıfrlyq baǵytqa da erekshe kóńil bólindi. Aqmola Hub alańynda óńirdegi startap bastamalar men suranysqa ıe Tech Orda jáne TUMO IT baǵdarlamalary tanystyryldy. Al kelýshilerdiń erekshe qyzyǵýshylyǵyn Tomorrow School jasandy ıntellekt mektebi týdyrdy. Munda stýdentterdiń bir-birimen tájirıbe almasyp, jańa daǵdylardy birge meńgerýine jáne ortaq jobalardy júzege asyrýyna múmkindik beretin peer-to-peer oqytý formaty tanystyryldy.
— Biz jastarǵa tsıfrlandyrýdyń kúndelikti ómirimizdiń bir bóligine aınalǵanyn kórsetkimiz keldi. Sondyqtan tehnologııalardyń damýyn syrttaı baqylap qana qoımaı, olardy meńgerip, tájirıbede qoldaný mańyzdy. Mundaı is-sharalar jastarǵa zamanaýı bilim alý múmkindikteri týraly aqparat berip, búgingi tańda baǵdarlamalaý men jasandy ıntellekt salasynda damýdy kez kelgen adam bastaı alatynyn kórsetýge múmkindik beredi, — dedi Kókshetaýdaǵy Tomorrow School óńirlik jetekshisi Danııar Abdrashıtov.
Sharanyń shyǵarmashylyq bóligi de mazmundy ótti. Qatysýshylar Holı boıaýlar festıvaline jáne sabyn kópirshikteri shoýyna qatysyp, kóshe mádenıetine qyzyǵýshylyq tanytqan jastar breık-dans pen DJ-batldardy tamashalady.
Sonymen qatar «Kitap oqıtyn ult» jobasy aıasynda «Ólmeıtuǵyn artyna sóz qaldyrǵan» ınteraktıvi uıymdastyryldy. Qala turǵyndary ádebıet salasyndaǵy bilimderin synap, tanymdyq oıynǵa belsendi qatysty.
Keshtiń sharyqtaý shegi — resmı marapattaý rásimi boldy. Óńirdiń damýyna úles qosyp júrgen 15 belsendi jasqa Aqmola oblysy ákiminiń atynan alǵys hattar tabystaldy.
Іs-shara qatysýshylarynyń biri Bahtııar Qashkenov jastarǵa arnalǵan baǵdarlamanyń mazmunyna oń baǵasyn berdi.
— Tamasha mereke boldy, baǵdarlama óte qyzyqty. IT alańyna da baryp, jastardyń jobalarymen tanystym, jarystardy da tamashaladym. Munda jaı ǵana demalyp qoımaı, ózińe paıdaly aqparat alýǵa múmkindik bar ekeni qýantady, — dedi ol.
Keshki ýaqytta ashyq aspan astyndaǵy kontserttik baǵdarlama jalǵasty. Al jastar kúniniń fınaly DJ DARKLIGHT qatysýymen ótken kóńildi dıskotekaǵa ulasyp, júzdegen Kókshetaý turǵyny men qonaǵy juldyzdy aspan astynda birge kóńil kóterdi.
«Aqmola Jastar Day — 2026» jastardy bir alańǵa jınap qana qoımaı, sportqa, shyǵarmashylyqqa, jańa tehnologııalarǵa jáne qoǵamdyq belsendilikke qyzyǵýshylyqtaryn arttyrýǵa múmkindik bergen aýqymdy jastar merekesine aınaldy.
