Kókshetaýda jasóspirimderge ishimdik satqan dúken ıeleri jaýapqa tartyldy
ASTANA. KAZINFORM — Kókshetaýda kámeletke tolmaǵandarǵa alkogol ónimderin satqan dúken ıelerine aıyppul salynyp, lıtsenzııasy toqtatylýy múmkin, dep habarlaıdy Kazinform agenttiginiń tilshisi.
Aqmola oblysy Polıtsııa departamentiniń baspasóz qyzmetiniń málimetinshe, óńirde jasóspirimder qylmysynyń aldyn alý sharalary jalǵasyp jatyr. Osy rette Kókshetaýda ýchaskelik ınspektorlar alkogoldi zańsyz satý faktilerin anyqtaǵan.
— Paıda tabýdy kózdegen eki azyq-túlik dúkeniniń ıeleri zań talaptaryn elemeı, ákimshilik jaýapkershilikke tartyldy. Tekserý qorytyndysy boıynsha olar QR ÁQBtK-niń 200-baby boıynsha jaýapqa tartyldy. Bul bapta aıyppul salý jáne lıtsenzııanyń qoldanylýyn toqtatý qarastyrylǵan. «Quqyqtyq tártip» is-sharasy aıasynda úsh kún ishinde óńirde osyndaı 12 derek tirkeldi. Bul kásipkerler men dúken qyzmetkerleri tarapynan baqylaýdyń jetkiliksiz ekenin kórsetedi, — delingen vedomstvo habarlamasynda.
Sonymen qatar túngi reıdter barysynda polıtsııa qyzmetkerleri eresekterdiń qaraýynsyz kóshede jáne oıyn-saýyq oryndarynda júrgen 88 jasóspirimdi anyqtady. Olardyń ata-analary men zańdy ókilderine balalardy tárbıeleý jáne baqylaý mindetterin tıisinshe oryndamaǵany úshin ákimshilik materıaldar toltyryldy.
Polıtseıler kásipkerlerdi zań talaptaryn qatań saqtaýǵa, al ata-analardy balalardyń bos ýaqytyn baqylaýǵa kóbirek kóńil bólýge shaqyrdy.
Osyǵan deıin Kókshetaýda balabaqsha mańyndaǵy apatty jaǵdaıda turǵan kópir qulaǵanyn jazǵan edik.
