Kókshetaýda «Jas týrıst-2018» kópsaıysynyń alǵashqy kezeńiniń jeńimpazdary anyqtaldy
KÓKShETAÝ. QazAqparat - Kókshetaýda «Jas týrıst-2018» týrıstik kópsaıystyń alǵashqy kezeńiniń jeńimpazdary anyqtaldy, dep habarlaıdy QazAqparat tilshisi.
Aqmola oblystyq bilim basqarmasynyń deregi boıynsha «Rýhanı jańǵyrý» baǵdalamasyn júzege asyrý sheńberinde Kókshetaýdaǵy №19 orta mekteptiń qabyrǵasynda uıymdastyrylǵan sharaǵa oblysymyzdyń Aqkól, Sandyqtaý, Zerendi jáne Jaqsy aýdandarynan kelgen mektepterdiń 120 -ǵa jýyq oqýshylary qatysty.
Sharany oblystyq balalar men jasóspirimderdiń týrızm jáne ekologııa ortalyǵy uıymdastyrdy. «Jas týrıst-2018» týrıstik kópsaıysynyń alǵashqy kezeńi «Jeke-komandalyq», «Baılanys», «Komandalyq» túrleri boıynsha ótti.
Eki kún qatarynan uıymdastyrylǵan sharada jastar arasynda oblystyq balalar men jasóspirimderdiń týrızm jáne ekologııa ortalyǵynyń «5 joǵarylyq» komandasy birinshi, Sandyqtaýdaǵy №3 balalar úıiniń «Saıahat» komandasy ekinshi jáne zerendilik «Shatýn-2» komandasy úshinshi oryn ıeledi.
Qyzdar arasynda kókshetaýlyq komanda «Jas kaırat-2» birinshi, taǵy eki kókshetaýlyq «Jas kaırat» pen oblys ortalyǵyndaǵy «SSh №19» komandalary ekinshi jáne úshinshi oryndardy ózara bólisti.
Al, eresekter arasynda «Fırn» komandasy birinshi, «Sınegore» komandasy ekinshi, «Shatýn» komandasy úshinshi oryn aldy. Jeńimpazdar grammotalar jáne baǵaly syılyqtarmen marapattaldy.
