Kókshetaýda «Jas daryn» mýzykanttar baıqaýy oblystyq kezeńniń jeńimpazdary anyqtaldy

KÓKShETAÝ. QazAqparat - QR Táýelsizdiginiń 30 jyldyǵyn merekeleý aıasynda Aqmola oblysynda ótken «Jas daryn» respýblıkalyq baıqaýynyń oblystyq kezeńi máresine jetti, dep habarlaıdy QazAqparat tilshisi.

Oblystyq bilim basqarmasynyń málimetinshe, aqpannyń 25-26 kúnderi aralyǵynda ótken baıqaýdyń oblystyq kezeńine Atbasar, Shortandy, Esil, Jarqaıyń, Jaqsy aýdandary jáne Kókshetaý qalasynan 50 jas mýzykant qatysyp, sheberlikterin ortaǵa saldy. Qatysýshylardyń arasynda 19 solıst, Kókshetaý qalasynan 1-úrmeli aspaptar orkestri, 2 skrıpkashylar ansambli jáne 1 fleıtashylar ansambli bar.

Qazylar alqasynyń sheshimimen baıqaýdyń bas júldesine Kókshetaý qalasyndaǵy Balalar mýzyka mektebiniń fleıta úıirmesine qatysýshy Aıqúmis Bıǵazy ıe boldy. Ol M.Ǵabdýllın atyndaǵy Kókshetaý qalasyndaǵy №3 mektep-gımnazııanyń 8 «v» synybynda oqıdy, respýblıkalyq jáne halyqaralyq baıqaýlardyń jeńimpazy jáne laýreaty. Aıqúmis Kókshetaý qalasynyń BMM úrmeli aspaptar orkestriniń quramynda jáne jeke oryndaýda óner kórsetip, mektep pen qalalyq deńgeıdegi kontsertterge belsendi qatysyp keledi.

Budan keıin «Úrmeli aspaptar» atalymy boıynsha kishi jas tobyndaǵylar arasynda 2 oryn – Kókshetaý qalasyndaǵy Balalar mýzyka mektebiniń tárbıelenýshisi Anastasııa Galımskaıa, orta jas tobyndaǵylar arasynda 1 jáne 2 oryndardy Kókshetaý qalasyndaǵy Balalar mýzyka mektebiniń tárbıelenýshileri Gleb Kýrılov, Maksım Sılakov, Gılanı Dzaýrov ózara bólisti.

Al, júldeli úshinshi oryndarǵa Esil qalasyndaǵy Balalar mýzyka mektebiniń tárbıelenýshileri Elızaveta Gom, Aleksandr Kosenko laıyq dep tanyldy.

Sonymen birge, «Úrmeli aspaptar» atalymy boıynsha joǵary jas toby jáne orkestrler, Іshekti-yspaly aspaptar klassy boıynsha kishi jas toby, orta jas toby, joǵary jas toby jáne ansambl arasynda jeńimpazdar anyqtalyp, arnaıy dıplom jáne syılyqtarmen marapattaldy.