Kókshetaýda jartylaı marafonnan keıin áıel kóz jumdy

ASTANA. KAZINFORM — Kókshetaýda ótken jartylaı marafon kezinde 5 shaqyrymdyq qashyqtyqta bir qatysýshy áıel ózin jaısyz sezinip, aýrýhanaǵa jetkizildi. Alaıda dárigerler onyń ómirin saqtap qala almady, dep habarlaıdy Kazinform tilshisi. 

Aqmola oblysynyń dene shynyqtyrý jáne sport basqarmasynyń baspasóz qyzmeti málim etkendeı, «Kókshetaý shamdary» atty jartylaı marafon kezinde 2025 jylǵy 23 tamyz kúni saǵat 21:50–de Saǵdıev/Jaǵalaý kósheleriniń qıylysynda, 4-shi shaqyrymda 35 jastaǵy áıeldiń jaǵdaıy kúrt nasharlaǵan. Ol 5 shaqyrymdyq qashyqtyqty júgirip kele jatqan.

— Uıymdastyrýshylar reglamentke sáıkes áreket etti: medıtsına qyzmeti, jedel járdem jáne polıtsııa jedel ári ýaqtyly jumys istedi. Dárigerler kelgenge deıin zardap shekken qatysýshyǵa oblystyq aýrýhananyń reanımatolog-dárigeri Indıra Sarybaeva men sport mektebiniń medıtsına qyzmetkeri Rýstam Qultaev alǵashqy kómek kórsetip, dereý reanımatsııalyq sharalardy bastaǵan, — delingen basqarma habarlamasynda.

Jedel járdem brıgadasy (reanımobıl) kelgen soń bir mınýt ishinde áıeldiń talmasy ustap, júrek soǵysy toqtap qalǵan. Oǵan shuǵyl kómek kórsetilip, kópbeıindi oblystyq aýrýhanaǵa jetkizildi.

Aýrýhanada da júrek soǵysy qaıta toqtap, naýqas jansaqtaý bólimine jatqyzyldy. 24 tamyz kúni tańǵy saǵat 05:45–te áıeldiń bıologııalyq ólimi tirkelgen.

Medıtsına qyzmetkerleriniń aıtýynsha, onyń óliminiń naqty sebebi sot-medıtsınalyq saraptamadan keıin belgili bolyp, jaqyndaryna habarlanatyn bolady.

—  Marafonǵa tirkelý kezinde barlyq qatysýshy ózderiniń jarysqa fızıkalyq turǵydan daıyn ekenin jáne densaýlyǵyna tolyq jaýapty ekenin rastaıtyn qolhatqa qol qoıady. Bul — álemdik tájirıbede osyndaı marafondarda qabyldanǵan talap. Marafon bastalǵan kúni úsh núktede medıtsınalyq qyzmetkerler alǵashqy kómek kórsetýge daıyn turdy. Júgirý baǵyttary polıtsııa jáne jedel járdem qyzmetimen aldyn ala muqııat pysyqtaldy, — dep tolyqtyrdy basqarma ókilderi.

Aqmola oblystyq polıtsııa departamentiniń baspasóz qyzmeti áıeldiń ólimine baılanysty qylmystyq is qozǵalǵanyn jáne tergeý júrip jatqanyn habarlady.

Aıta ketelik Astanadaǵy marafonǵa 5 myńǵa jýyq adam qatysqan edi.