Kókshetaýda janarmaı quıý beketinde jarylys bolyp, operator qaza tapty

KÓKShETAÝ. QazAqparat – Kókshetaýda janar-jaǵarmaı quıý beketinde jarylys bolyp, 35 jastaǵy operator kóz jumdy, dep habarlaıdy QazAqparat tilshisi Aqmola oblystyq TJD baspasóz qyzmetinen.

Vedomstvonyń málimetinshe, oqıǵa búgin 16 aqpanda Kókshetaý qalasynyń Soltústik ındýstrııalyq aımaǵyndaǵy «Qazaqoil» janar-jaǵarmaı quıý stansasynyń aýmaǵynda bolǵan.

Janarmaı tasymaldaıtyn eki tsısterna janyp ketti.

«Órt 11:05-te oqshaýlanyp, 20 mınýt ishinde tolyq joıyldy. Órt aýmaǵy 35 sharshy metrdi qurady. Órt saldarynan janarmaı quıý beketiniń operatory 1988 jylǵy er adam qaza tapty. Órttiń shyǵý sebebi anyqtalýda», - dedi vedomstvodan.

Aıta ketsek, munyń aldynda «Astana-Petropavl» tasjolynda kólik órtenip ketken edi.

Foto: Aqmola oblystyq TJD baspasóz qyzmeti