Kókshetaýda Jańa jyldy toılaýǵa 55,4 mln teńge bólinedi

KÓKShETAÝ. KAZINFORM – Bıyl Kókshetaýda alǵash ret negizgi jańajyldyq sharalar «Jańa jaǵalaý» jáne «Kók shalǵyn» qoǵamdyq keńistikterinde ótedi. Bul týraly qala ákimdigi habarlady.

Ákimdik málimetinshe, 2025 jyly oblys ortalyǵynda jańajyldyq bezendirýge jáne merekelik is-sharalardy uıymdastyrýǵa 55,4 mln teńge qarastyrylǵan.

Bul qarajat tek qalanyń qoǵamdyq keńistikterin bezendirýge jáne jalpy qalalyq sharalardy ótkizýge baǵyttalady.

«Bıyl alǵash ret negizgi merekelik oqıǵalar jańa qoǵamdyq keńistikter — „Jańa jaǵalaý“ men „Kók shalǵyn“ alańdarynda ótedi. Sondaı-aq Abylaı han alańy men basqa da qalalyq aýmaqtarda merekelik aımaqtar ázirlenedi. Jańajyldyq shyrshalar, jaryq ınstallıatsııalar, muz músinderi jáne shaǵyn arhıtektýralyq formalar ornatylady. Barlyq bezendirý jumystarynda qalanyń bekitilgen dızaın-kody negizge alynady», — dep habarlady vedomstvo.

Al qala ákimi kásipkerlerdiń de merekelik atmosfera qalyptastyrýǵa atsalysýy qajet ekenin atap ótip, bıznes ókilderin óz nysandaryn jańajyldyq stılde bezendirýge shaqyrdy.

Bıyl bas shyrshany jaǵý rásimi 19 jeltoqsanda «Jańa jaǵalaý» alańynda bolady. Al 31 jeltoqsanda osy jerde negizgi merekelik baǵdarlama men feıerverk uıymdastyrylady.

Merekeler kezinde qalanyń kommýnaldyq jáne qaýipsizdik qyzmetteri úılestirý, tehnıkalyq qamtamasyz etý jáne qoǵamdyq tártipti saqtaý sharalaryn júzege asyrady.

Aıta keteıik, muz astyna qulap ketken úsh balany qutqarǵan Kókshetaý turǵyny memlekettik marapatqa usynylady.