Kókshetaýda jańa sý tazartý qurylystary iske qosyldy
KÓKShETAÝ. KAZINFORM — Kókshetaýda Qazaqstan Respýblıkasy Konstıtýtsııasynyń 30 jyldyǵy kúni sý tazartý qurylǵylaryn iske qosý rásimi ótti, dep habarlaıdy Aqmola oblysynyń ákimdigi.
Bul jobany qala turǵyndary 14 jyldan astam ýaqyt boıy kútti. Nysan paıdalanýǵa berilgennen keıin Kókshetaý tolyq kólemde sapaly ári qaýipsiz aýyz sýmen qamtyldy.
Ashylý rásimine Aqmola oblysynyń ákimi Marat Ahmetjanov qatysty. Ol sý tazartý qurylystarynyń salynýy Memleket basshysynyń tapsyrmalaryn júıeli oryndaýdyń nátıjesi jáne azamattardyń ómir sapasyn arttyrýdyń sımvoly ekenin atap ótti.
— Taza sý — densaýlyq kepili, al halyqty sapaly aýyz sýmen qamtý — jergilikti atqarýshy organdardyń tikeleı mindeti. Sý tazartý qurylystaryn jańǵyrtýdan buryn mańyzdy daıyndyq kezeńi ótti: túrli tehnologııalar men sheteldik tájirıbeler zertteldi. Bul úlgidegi qurylǵylar aımaq sýynyń erekshelikteri men klımattyq jaǵdaıyna sáıkes salyndy. Jańa keshen qalany senimdi túrde aýyz sýmen qamtyp, onyń bolashaqtaǵy damýyna negiz qalaıdy, — dedi óńir basshysy.
Sý tazartý qurylǵylary rekordtyq merzimde salyndy. Basty tehnologııalyq jetistik — bes satyly sý tazartý júıesin engizý. Dástúrli dezınfektsııa, koagýlıatsııa jáne fıltratsııa kezeńderinen bólek, alǵash ret flokýlıatsııa jáne sedımentatsııa protsesteri qoldanyldy. Sondaı-aq fıltratsııa protsesi jańǵyrtylyp, sý qum men antratsıt kómirinen ótkizilip, ıisinen arylyp, ottegimen baıytyldy. Bul sýdyń kúndelikti tutynýǵa qaýipsiz eń joǵary sapasyna qol jetkizýge múmkindik berdi.
Jobanyń quny 6,3 mlrd teńgeni qurady. Keshenniń ónimdiligi táýligine 30 000 m³-ke jetedi, al qalanyń qazirgi tutynýy — 20 000 m³. Jańa nysan Kókshetaýdyń suranysyn tolyq jaýyp qana qoımaı, qalanyń bolashaqtaǵy ósýine de qor jasaıdy.
Jobanyń áleýmettik-ekonomıkalyq áseri de zor: qala tolyq kólemde sapaly aýyz sýmen qamtyldy, sonymen qatar Sergeevka sý qoımasynan sý satyp alýdan bas tartý esebinen jylyna 1 mlrd teńgege deıin qarajat únemdeýge múmkindik týdy.
Qazirgi tańda barlyq qurylys-montaj jáne iske qosý jumystary tolyq aıaqtaldy. Endi nysan qala turǵyndaryn taza aýyz sýmen qamtamasyz etip otyr.