Kókshetaýda jańa stýdentter saraıy salynyp jatyr
Ýnıversıtet rektory Mádı Elıýbaevtyń aıtýynsha, qurylys ýchaskesiniń jalpy aýmaǵy 8 myń sharshy metrden asady.
«Stýdentter saraıy bolashaqta eki ǵımarattan turady. Birinshisi - stýdenttik amfıteatr, ekinshisi - sport kesheni. Qazirgi ýaqytta árleý jumysy júrip jatyr, qurylys materıaldary retinde tas, fıbrogıps, metall qoldanylýda. Edenge keramıkalyq plıtalar tóseledi. Sondaı-aq munda kontsert zaly, dybys jazý stýdııalary, balet, dombyra, ıaǵnı stýdentterdiń shyǵarmashylyǵyn kásibı damytý úshin qajet nárseniń bári qarastyrylǵan. Sport keshenine voleıbol, basketbol zaldary kiredi, jeke jattyǵý zaly, kúres zaly bar», - dep túsindirdi Mádı Elıýbaev.
Osy rette qurylys jumystarymen tanysqan aımaq basshysy stýdentter saraıynda keleshekte túrli aýqymdy sharalar ótkizýge bolatynyn atap ótti.
«Bul - óte erekshe joba, jaqsy arhıtektýralyq nysan. Sport kesheninde respýblıkalyq, halyqaralyq jarystar ótkizýge bolady», - dedi Ermek Marjyqpaev.
Aıta ketsek, budan buryn Aqmola oblysynda 25 jol-kólik ınfraqurylymy jobasy qolǵa alynǵanyn jazǵan edik.
