Kókshetaýda jańa 3 kommýnaldyq bazar salynady
KÓKShETAÝ. QazAqparat - Kókshetaýda áleýmettik mańyzdy azyq-túlik taýarlarynyń baǵasyn turaqtandyrý maqsatynda jańa 3 kommýnaldyq bazar salynady, dep habarlaıdy QazAqparat tilshisi oblystyq ishki saıasat basqarmasyna silteme jasap.
Vedomstvodan atap ótkendeı, Aqmola oblysynda jergilikti bılik tarapynan áleýmettik mańyzdaǵy azyq-túlik taýarlarynyń baǵasyn turaqtandyrý boıynsha tıisti sharalar qolǵa alynýda. Sonyń ishinde maýsym kezinde birinshi kezekte qajetti azyq-túlik taýarlarynyń baǵasyn turaqtandyrý jumystary turaqtandyrý qory arqyly júzege asyrylady.
Sharýashylyq taýarlaryn satý jáne turǵyndar úshin qoljetimdi bolý úshin «Esil» áleýmettik kásipkerlik korporatsııasy Kókshetaý qalasynyń shetki aýdandarynda úsh kommýnaldyq bazar salýdy josparlap otyr. Aýmaǵy 200 metr pavılondar Abylaı han dańǵylyndaǵy 6 jáne 11 turǵyn úılerdiń mańynda, sondaı-aq, Kóktem shaǵyn aýdanyndyǵy 7 úıdiń janynda ornalasatyn bolady.
«Esil» áleýmettik kásipkerlik korporatsııasy» aktsıonerlik qoǵamy» basqarmasynyń tóraǵasy Erbol Jaqsylyqovtyń aıtýynsha, qazirgi tańda smeta, saraptama, jobalyq qujattama jáne ózge daıyndyq sharalary aıaqtaldy.
«Bizdiń josparymyz boıynsha kommýnaldyq bazarlardyń qurylysy maýsymnyń 1-nen bastalyp, qyrkúıektiń 1-de aıaqtalýy tıis»,- deıdi E.Jaqsylyqov.
«Esil» áleýmettik kásipkerlik korporatsııasyndaǵylar atap ótkendeı, bul saýda oryndarynda jergilikti kásiporyndar shyǵarǵan áleýmettik mańyzdy azyq-túlik taýarlary turǵyndar úshin arzan baǵamen satylmaqshy. Ásirese, balǵyn ónimder jyl boıy úzdiksiz jetkizilip otyrady.
