Kókshetaýda Jambyl Jabaevtyń 175 jyldyǵyna arnalǵan oqýshylar aıtysy ótti

KÓKShETAÝ. QazAqparat - Kókshetaýdaǵy «Dostar» mádenıet saraıynda El Táýelsizdiginiń 30 jyldyǵy jáne Jambyl Jabaevtyń 175 jyldyǵyna arnalǵan «Rýhanı qazyna-2021» respýblıkalyq festıvaliniń is-sharalar jospary aıasynda «Tyńda, dala, Jambyldy!» oqýshylar arasynda aqyndar aıtysy ótti, - dep habarlaıdy QazAqparat oblystyq ishki saıasat basqarmasyna silteme jasap.

Oblystyq halyq shyǵarmashylyǵy jáne mádenı demalys ortalyǵynyń málimetinshe, sharany ótkizýdiń negizgi maqsaty - Uly aqyn Jambyl Jabaevtyń aqyndyq murasyn nasıhattaý, óskeleń urpaqty folklorlyq shyǵarmashylyqqa baýlý, dástúrli án ónerindegi sabaqtastyqty saqtaý, talantty jas oryndaýshylardy anyqtaý jáne qoldaý. Sharaǵa Aqmola jáne Soltústik Qazaqstan oblystarynan 12-18 jas aralyǵyndaǵy jas aqyndar qatysty.

Aıtysqa sýyryp salma aqyn, Málik Ǵabdýllın murajaıynyń dırektory Qudaıberli Myrzabek, aqyn, jazýshy, QR Jýrnalıster Odaǵy Aqmola oblystyq bólimshesiniń tóraǵasy, «Kókshetaý» gazetiniń bas redaktory Serik Jetpisqalıev, oblystyq halyq shyǵarmashylyǵy jáne mádenı demalys ortalyǵynyń mádenı-demalys jumysyn uıymdastyrý bóliminiń basshysy Asylbek Ábenov qazylyq etti.

Aıtys qorytyndysy boıynsha Aqmola oblysy Ereımentaý aýdanynyń ókili Sáttibek Serikbolatuly bas júldege ıe boldy.

«Búgin óte mańyzdy shyǵarmashylyq jarys ótti, onda qatysýshylar Qazaqstannyń Táýelsizdik jyldaryndaǵy jetistikterin jáne qazaqtyń uly aqyny Jambyl Jabaevtyń shyǵarmashylyǵyn jyrlady. Aıtyskerlerdiń árqaısysy sheberliktiń joǵary deńgeıin kórsetti. Baıqaýdyń jeńimpazy atanǵanyma óte qýanyshtymyn. Uıymdastyrýshylarǵa úlken alǵysymdy bildirgim keledi», - dedi S. Serikbolatuly.

Aıtystyń jeńimpazdary men júldegerlerine dıplomdar, baǵaly syılyqtar men estelik kádesyılar tabys etildi.