Kókshetaýda jalǵan polıtseıler ustaldy
KÓKShETAÝ. QazAqparat - Kókshetaýda ózderin polıtsııa qyzmetkeri dep tanystyrǵan eki kúdikti ustaldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, naýryzdyń 30-da Kókshetaý qalalyq PB kezekshi bólimine Áýezov kóshesiniń boıynda turatyn turǵyn habarlasyp, úı aýmaǵynda formadaǵy polıtsııa qyzmetkerleri medıtsınalyq maskasyz jáne arnaıy qolǵapsyz júrgenin aıtqan. Qala turǵynyna olardyń júrisi kúdik týǵyzǵan.
«Atalǵan mekenjaıǵa barǵan polıtsııa qyzmetkerleri «áriptesterin» anyqtaý úshin oblys ortalyǵyndaǵy PB jetkizdi. Anyqtalǵandaı, 34 jastaǵy kúdikti Zerendi aýdanyndaǵy aýyldardyń biriniń turǵyny bolyp shyqty. Ol aqpan aıynda tanystary arqyly «halyq elshisimen» tanysqan. Keıin er adam oǵan polıtsııa formasyn berip, onyń qyzmetke taǵaıyndalǵany týraly buıryq shyqqanyn aıtyp sendirgen. Osy kezde 35 jastaǵy kúdikti «patsıentiniń» ógeı ákesimen sóılesip, qyzmettik páter alyp berýge ýáde etken. Ol qujattardy tezdetip rásimdeý úshin 400 myń teńge aqsha suraǵan. Oǵan senip qalǵan er adam alaıaqtyń suraǵan aqshasyn qolyna ustata salǵan», - deıdi vedomstvodan.
Belgili bolǵandaı, er adam psıhıatrııalyq dıspanserde esepte bolǵan. Al, kúdikti er adam men áıel polıtsııa formasyn kıip alyp, túnde qala kóshelerin aralaǵan.
