Kókshetaýda jalǵan aqparat taratqandar isti boldy
KÓKShETAÝ. QazAqparat - Kókshetaýda koronavırýs týraly jalǵan aqparat taratqan 56 jastaǵy jergilikti turǵyn ustaldy, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.
Vedomstvonyń málimetinshe, 24 naýryzda polıtsııa qyzmetkerleri WhatsApp messendjerine monıtorıng júrgizý kezinde Ońtústik Koreıadan ushyp kelgen, koronavırýs juqtyrýy múmkin azamattardyń jergilikti emdeý mekemelerinde ornalastyrylǵandyǵy týraly jalǵan aqparatty anyqtaǵan.
«Aýdıojazba arqyly taratylǵan feık aqparattyń avtoryn anyqtaý boıynsha jedel izdestirý sharasy qolǵa alyndy. Nátıjesinde Kókshetaý qalasynyń 56 jastaǵy turǵyny ustaldy. Anyqtalǵandaı, áıel tanysynyń úıinde qonaqta bolǵanynda Ońtústik Koreıadan áýe reısimen ushyp kelgen qazaqstandyqtardyń Aqmola oblysyndaǵy emdeý mekemelerine ornastyrylǵandyǵyn estip, keıin ózge tanysyna aýdıojazba arqyly jibergen. Óz kezeginde tanys áıel aqparattyń ras, ótirigine kóz jetkizbesten 200 astam qoldanýshy bar WhatsApp-taǵy topqa jibergen», - deıdi vedomstvodan.
Qazirgi kezde, osy oqıǵa baılanysty úsh zań buzýshynyń ústinen QR Qylmystyq kodeksiniń 274-baby boıynsha (jalǵan aqparat taratý) sotqa deıingi tergeý amaldary júrgizilýde.
