Kókshetaýda jaǵalaý qurylysy kezinde 170 mln teńge urlandy

KÓKShETAÝ. KAZINFORM – «Naberejnaıa» jobasy boıynsha jasalǵan urlyqty jasyrý maqsatynda jumystyń bir bóligi Atbasar qalasyndaǵy basqa qurylys nysany boıynsha urlanǵan qarajat esebinen júrgizilgen.

Aqmola oblysy prokýratýrasynyń habarlaýynsha, Kókshetaý qalasy ákimdigi turǵyn úı-kommýnaldyq sharýashylyǵy bóliminiń jáne «M-Stroı proekt» JShS tehnıkalyq qadaǵalaý bóliminiń burynǵy basshylary, sondaı-aq «PavlodarEnergoMontaj» JShS merdigerlik uıymynyń is júzindegi ıesi ustalyp, ýaqytsha ustaý ızolıatoryna qamaýǵa alyndy. Olarǵa Kókshetaý qalasynda eski áýejaıdan Qan ortalyǵyna deıingi aralyqta jaǵalaý salý úshin bólingen 170 mln teńgeden astam qarajatty jymqyrdy degen aıyp taǵylǵan.

- Kúdiktilerdiń is-áreketteri QR QK 189-babynyń 4-bóligi boıynsha, ıaǵnı múlikti asa iri mólsherde ysyrap etý. Osy bap boıynsha kózdelgen jaza – dúnıe-múlikti tárkilep, 12 jylǵa deıin bas bostandyǵynan aıyrý. Barlyq kúdiktiler sottyń sanktsııasymen qamaýǵa alyndy. Prokýrorlar «Naberejnaıa» jobasy boıynsha jasalǵan urlyqty jasyrý maqsatynda jumystardyń bir bóligi Atbasar qalasyndaǵy basqa qurylys nysanynda urlanǵan qarajat esebinen júrgizilgenin anyqtady. Bir kúdikti qosymsha QR QK 218 babynyń 3-bóligi, ıaǵnı qylmystyq jolmen alynǵan aqshany jáne ózge de múlikti zańdastyrý boıynsha da jaýap beredi. Bul úshin 10 jylǵa deıin bas bostandyǵynan aıyrý jáne dúnıe-múlkin tárkileý jazasy qarastyrylǵan, - deıdi vedomstvo ókilderi.

Sondaı-aq, tergeý barysynda Astanadan qylmystyq jolmen alynǵan kommertsııalyq jyljymaıtyn múlik tabyldy. Onyń baǵalaý quny 95 mln teńge.

Prokýrorlardyń aıtýynsha, qylmystyq isti tergeý aıaqtalýǵa jaqyn. Іstiń sońǵy núktesin sot qoıady.

Buǵan deıin Aqtóbede 35 mln teńge jymqyrǵan mekeme basshysy sottalǵanyn jazǵan edik.