Kókshetaýda zańsyz jınalǵan qoqysty tazartý jumysy júrip jatyr
KÓKShETAÝ. QazAqparat – Aqmola oblysynda eldi mekenderdi abattandyrý, sanıtarlyq tazalyq jáne kógaldandyrý aılyǵy máresine jetti, dep habarlaıdy QazAqparat tilshisi.
Jyl saıyn uıymdastyrylatyn ekologııalyq mádenıetke tárbıeleý jáne tabıǵı orta tazalyǵyn saqtaý aılyǵy kezinde óńirdegi 570 eldi mekende senbilik jáne taza besenbilik uıymdastyrylyp, 271 skver men saıabaq abattandyryldy, 10 myńnan astam aǵash pen buta otyrǵyzyldy.
Sanıtarlyq tazalyq kezinde 158 qoqys alańy tazartyldy. Onyń ishinde Kókshetaý qalasynda zańsyz jınalǵan qoqys alańdaryn tazartý boıynsha aıtarlyqtaı jumystar atqaryldy.
Polıtsııa qyzmetkerleri abattandyrý men sanıtarlyq normalardyń buzylý boıynsha 625 zań buzýshylyqty anyqtady.
Merdiger «Artal Trade» JShS málimetinshe, tazalyq aılyǵy barysynda Kókshetaý qalasyndaǵy jeke sektorlardan 770 tonna qoqys shyǵarylǵan.
«Tımırıazev, Dalnıı proezd, Ýálıhanov, Polevoı, Saın, Shevchenko, Áýezov kósheleriniń boıynda zańsyz jınalyp qalǵan 100 KamAZ qoqys shyǵaryldy. Qansha tazalanyp jatqanyna qaramastan, turǵyndar zańsyz qoqys alańdaryna qoqys laqtyrýlaryn qoıar emes. Sol sebepti, turǵyndar osy máselege túsinistikpen qarap, qoqysty arnaıy belgilengen oryndardaǵy qoqys jáshikterine salǵany durys», - deıdi kásiporyn dırektory Talǵat Nııazbekov.
Aıtalyq, búgingi kúni oblysta qoqysty bólektep jınaý máselesi birtindep sheshilýde. Plastık pen kartondy bólek jınaý úshin 36 qoqys konteıneri ornatylǵan.
Máselen, Kókshetaý qalasynda qatty turmystyq qaldyqtardy jınaýmen «Kókshe-Tazalyq» jáne «ECO Group» seriktestikteri aınalysady. Osy rette 2836 qoqys konteıneri ornatylǵan.
