Kókshetaýda zamanýı sport alańy ashyldy
KÓKShETAý. QazAqparat - Aqmola oblysynda buqaralyq sportty damytýǵa kóp kóńil bólinýde. Jyl saıyn jańa sport alańdary, stadıondar, dene shynyqtyrý-saýyqtyrý keshenderi salynyp jatyr.
El Táýelsizdiginiń 30 jyldyǵy men Konstıtýtsııa kúni qarsańynda Kókshetaýda Qajymuqan atyndaǵy №3 olımpıadalyq rezervtiń oblystyq mamandandyrylǵan balalar men jasóspirimder mektebiniń aýmaǵynda jańartylǵan keshendi sport alańy ashyldy, dep habarlaıdy QazAqparat tilshisi oblystyq ishki saıasat basqarmasyna silteme jasap.
Dene shynyqtyrý jáne sport basqarmasynyń málimetinshe, kúrdeli jóndeýden keıin zamanaýı talaptarǵa saı keletin sport nysanynda balalar fýtbol, basketbol oınap, strıt-vorkaýtpen aınalysa alady.
«Jańa alań qorshalǵan jáne jaraqattanýdan qorǵaıtyn jabyn tóselgen, barlyq qajetti sporttyq quraldarmen jabdyqtalǵan. Bizdiń mindetimiz-jas sportshylarǵa qolaıly jaǵdaı jasaý. Alań jyl boıy suranysqa ıe bolady dep úmittenemiz. Balalar munda sportpen shuǵyldanyp, salaýatty ómir saltyn ustanatyn bolady», - dep atap ótti oblystyq dene shynyqtyrý jáne sport basqarmasynyń basshysy Áset Búkibaev.
Jańartylǵan sport alańynyń ashylýy balalar men jasóspirimder mektebiniń qyzmetkerleri úshin qýanyshty oqıǵa boldy.
«Mektep sektsııalarynyń tárbıelenýshileri árdaıym osynda aınalysady. Atalmysh shaǵynaýdandaǵy balalar kún saıyn osynda keledi. Óńirde sporttyq ınfraqurylym jyl saıyn jaqsaryp, jańaryp jatqanyn kórip otyrmyn», - dep basketboldan jattyqtyrýshy Vıktorııa Volkova.
Aıta ketsek, búginde oblysta 2 483 sport ǵımaraty bar, onyń 70 paıyzy aýylda, onda ár túrli sport túrleri boıynsha sektsııalar jumys isteıdi. «Aýyl – el besigi» baǵdarlamasy aıasynda bıylǵy jyly Jaqsy aýylynda dene shynyqtyrý-saýyqtyrý kesheniniń jáne Býrabaı aýdanynyń Mádenıet aýylynda sport kesheniniń qurylysyn bastaý josparlanǵan. Sonymen qatar, Şýche qalasynda Sport saraıynyń qurylysyna oblystyq bıýdjetten qarajat bólindi, 12 aýdanda jańa sport alańdary ashylady. Shortandy kentindegi stadıonǵa kúrdeli jóndeý júrgizilmekshi.
