Kókshetaýda zamanaýı kompıýterlik tomografııa kabıneti ashyldy
KÓKShETAÝ. QazAqparat - Kókshetaý qalasynda zamanaýı kompıýterlik tomografııa kabıneti ashyldy, dep habarlaıdy QazAqparat tilshisi oblys ákimdiginiń baspasóz qyzmetinen silteme jasap.
Vedomstvonyń málimeti boıynsha, búgin aımaq basshysy Ermek Marjyqpaev Kókshetaý qalalyq kópbeıindi aýrýhanasynda bolyp, jańadan ashylǵan kompıýterlik tomografııa kabınetin aralap kórdi. Joba memlekettik-jekeshelik áriptestik sheńberinde júzege asyrylyp otyr.
«Bul Kókshetaý qalasy úshin eleýli oqıǵa. Elbasymyz medıtsınalyq qyzmet kórsetý sapasyna úlken nazar aýdaryp keldi, ol halyqtyń áleýmettik kóńil-kúıiniń mańyzdy quramdas bóligi bolyp tabylady», - dep atap ótti aımaq basshysy.
Bas dáriger Banýjan Janǵalovtyń sózinshe, atalǵan kompıýterlik tomografııa kórsetý ashyqtylyǵymen, 4 ólshemdi zertteýlerdi oryndaýymen jáne az sáýle júktemesimen erekshelenedi. Kúnine 20-25 zertteý júrgizý josparlanýda. Kabınet saǵat 8-den bastap saǵat 20.00-ge deıin jumys isteıdi.
Joǵary sapaly tomografııany qoldaný, ınsýlt, tynys alý, qan aınalymy júıesiniń aýrýlary, as qorytý aǵzalary tárizdi dertterge erte dıagnostıka júrgizýge múmkindik beredi.
Kompıýterlik dıagnostıka jasaý, tegin medıtsınalyq kómekke kepildik beriletin kólemniń aıasynda, sondaı-aq, aqyly negizde júzege asyrylatyn bolady. Quny, qajetti zertteý júrgizý túrine qaraı 10 000 teńgeden 25 000 teńgege deıin quraıdy.
Aıta keteıik, qalalyq kópbeıindi aýrýhananyń úsh qabatty ǵımaratyna 2018 jyly 55 mıllıon teńgege kúrdeli jóndeý jumystary júrgizildi. Aǵymdaǵy jyly jergilikti bıýdjet qarajatynyń esebinen quny 58,6 mıllıon teńge turatyn rentgen jabdyǵyn jetkizý josparlanýda. Bıyl Aqmola oblysy boıynsha medıtsınalyq qural-jabdyqtarmen jabdyqtalýy kórsetkishi 2018 jylmen salystyrǵanda 10 paıyzǵa artqan.
Atap aıtqanda, 2019 jyly jergilikti bıýdjet qarajatynyń esebinen densaýlyq saqtaý obektileriniń materıaldyq-tehnıkalyq jabdyqtalýy úshin 1,5 mıllıard teńge qarastyrylyp otyr.
