Kókshetaýda vaktsına alǵan zaýyt qyzmetkerlerine aqshalaı syıaqy berilýde
KÓKShETAÝ. QazAqparat - Kókshetaýda vaktsına alǵan nan zaýytynyń qyzmetkerlerine 2 myń teńgeden berilýde. Bul týraly «Aqsaı nan» jaýapkershiligi shekteýli seriktestiginiń dırektory Sáýle Sobolevskaıa málim etti, dep habarlaıdy QazAqparat tilshisi.
Kásiporyn basshysynyń aıtýynsha, búgingi tańda nan zaýytynda jumysshylardy jappaı vaktsınatsııalaý boıynsha nátıjeli jumystar júrzilýde. Olardy yntalandyrý úshin aqshalaı syıaqy da qarastyrylǵan.
«Koronavırýs ınfektsııasynyń taralýyn toqtatýdyń jalǵyz joly – jappaı vaktsına saldyrý. Sondyqtan ár adam bul jaǵdaıǵa úlken jaýapkershilikpen qaraýy kerek. Bizdiń kásiporyn ujymy da osyǵan erekshe mán berip otyr. Basshylyq tarapynan túsindirý jumystaryn júrgizip, jumysshylarymyzdy barynsha yntalandyryp jatyrmyz. Maýsymnyń 25-28 aralyǵyndaǵy Krasnoıar kentindegi emhananyń mamandary kásiporynǵa kelip, jumysshylarymyzǵa jappaı ekpe salýdy josparlap otyr. Búgingi tańda nan zaýytynda barlyǵy 172 adam jumys isteıdi. Olardyń 19-y vaktsına alyp úlgerdi. Birer kúnde taǵy 55 adam vaktsına alady. Vaktsına alǵandarǵa kásiporynnyń kásipodaq uıymy arqyly 2 myń teńgeden aqshalaı syıaqy beremiz», - deıdi Sáýle Sobolevskaıa.
Sonymen birge, ol aldaǵy shilde aıynyń 1-nen bastap, jumysshalardyń vaktsına alǵandyǵy týraly tólqujaty bolýy nemese PTR testen ótkendigin bildiretin anyqtama arqyly ǵana jumysqa jiberiletinin atap ótti.
