Kókshetaýda úılerdiń qabyrǵalaryna tarıhı tulǵalardyń sýretteri salynýda
KÓKShETAÝ. QazAqparat - Kókshetaýda bir-birine syrt kelbeti uqsas kópqabatty turǵyn úılerdiń qabyrǵalary strıt-art kompozıtsııasymen árlenýde, dep habarlaıdy QazAqparat tilshisi.
Qala ákimdiginiń málimetinshe, dál qazir 6 kompozıtsııanyń nobaıy bekitilip, eki kópqabatty turǵyn úıdiń qabyrǵasyna at ústindegi Abylaı han men qazaqtyń kórnekit ǵalymy Shoqan Ýálıhanovtyń sýretterin salynýda. Tamyz aıynyń sońyna deıin 21 ǵımaratta osyndaı strıt art kompozıtsııasy paıda bolady. Onda saq stıli sııaqty tarıhı sýretterdi salý josparlanǵan.
«Strıt-art kóshedegi sýret bolǵanymen, bul úlken óner. Alyp, sýretterdi kórgen adam ónerdi baǵalap qana qoımaıdy, tarıhymyzǵa da kóz júgirtedi», - deıdi «Dızaın sıtı» jarnamalyq agenttiginiń jetekshisi Oljas Ábýov.
Aıta keteıik, bıyl kúzde Kókshetaý qalasynda Qazaqstan men Reseıdiń óńiraralyq yntymaqtastyǵynyń 17-shi forýmyn ótkizý josparlanǵan. Osyǵan oraı, qalada daıyndyq jumystary qyzý júrgizilýde.
