Kókshetaýda úıindegi órtti sóndirmek bolǵan zeınetker qaza tapty
KÓKShETAÝ. QazAqparat – Kókshetaýda órtengen jeke turǵyn úıden 63 jastaǵy er adamnyń máıiti tabyldy. Ol áıelin kómek shaqyrýǵa jiberip, ózi órtti sóndirmekshi bolǵan, dep habarlaıdy QazAqparat tilshisi Aqmola oblystyq TJD baspasóz qyzmetine silteme jasap.
Vedomstvonyń málimetinshe, órt 10 jeltoqsanda saǵat 03:41-de Sabataev kóshesiniń boıyndaǵy turǵyn úıde oryn alǵan. Órt aýmaǵy 48 sharshy metrdi qurady. Tilsiz jaýdy aýyzdyqtaý kezinde 63 jastaǵy er adamnyń denesi tabyldy.
«Órt úıdiń kireberisinen shyqqan. Úı ıeleri ystyń ıisinen oıanǵan. Er adam terezeni buzyp áıelin syrtqa shyǵarady. Ony kómek shaqyrýǵa jiberip, ózi órtti sóndirmekshi bolǵan. Órt sóndirýshiler kelgende er adamnyń jansyz denesi úıdiń ishinde jatty», - deıdiKókshetaý qalalyq TJB bastyǵy Áset Jaqsylyqov.
Vedomstvodan atap ótkendeı, órt saǵat 05:05-te aýyzdyqtaldy. Órttiń shyǵý sebepteri anyqtalýda.
