Kókshetaýda úsh mereıtoı toǵysqan aýqymdy mádenıet aptalyǵy ótedi
KÓKShETAÝ. KAZINFORM - Qazan aıynyń alǵashqy onkúndiginde Kókshetaý elimizdiń túkpir-túkpirinen óner maıtalmandary men sahnalyq ónersúıer qaýymdy jınaıtyn mádenı ortalyqqa aınalady.
Aqmola oblysynda birden úsh tarıhı mereıtoıdy toǵystyratyn aýqymdy mádenıet aptalyǵy ótedi.
Bıyl Úkili Ybyraı atyndaǵy Aqmola oblystyq fılarmonııasynyń qurylǵanyna – 80 jyl, Shahmet Qusaıynov atyndaǵy Aqmola oblystyq qazaq mýzykalyq-drama teatry óziniń 30-shy mereıtoılyq maýsymyn ashsa, Aqmola oblystyq orys drama teatry 50-shi mereıtoılyq maýsymyn bastaıdy.
Úsh óner ujymy – óńirdegi kásibı ónerdiń qalyptasýy men damýynyń jarqyn shejiresin, urpaqtar sabaqtastyǵyn jáne ulttyq mádenıetke degen adal qyzmetti tanytatyn irgeli shyǵarmashylyq ortalar.
Mádenıet aptalyǵynyń ashylýy 7 qazanǵa josparlanǵan. Bul kún tolyǵymen Úkili Ybyraı atyndaǵy Aqmola oblystyq fılarmonııasynyń 80 jyldyǵyna arnalady.
Osy kúni fılarmonııa basshylary men sala sarapshylarynyń qatysýymen, belgili aqyn ári jýrnalıst Baıkal Baıadıldyń moderatorlyǵymen «Tazalyq – mádenıettiń bastaýy» atty respýblıkalyq dóńgelek ústel ótedi.
Sondaı-aq sharaǵa qatysýshylar shyǵarmashylyq salaǵa mamandar daıarlaıtyn Aqan seri atyndaǵy joǵary mádenıet kolledjine barady.
Kúnniń basty mádenı oqıǵasy – fılarmonııanyń shyǵarmashylyq ujymdary men orkestrleri jáne respýblıkanyń belgili óner juldyzdary qatysatyn gala-kontsert bolmaq. Keshte Seken Turysbek, Qaırat Baıbosynov, Birjan Hasanǵalıev jáne Aıtqalı Jaıymov óner kórsetedi.
8 qazanda mádenıet aptalyǵynyń estafetasyn Shahmet Qusaıynov atyndaǵy Aqmola oblystyq qazaq mýzykalyq-drama teatry jalǵastyrady. Kórermen nazaryna Mara Baıdjıevtiń «On ekinshi kún» komedııasy usynylady. Qoıylymdy Qazaqstannyń eńbek sińirgen qaıratkeri Tóleýbek Kóńbaı sahnalaǵan.
Bul kesh Qazaqstannyń halyq ártisi Jibek Bagısova úshin de erekshe bolmaq. Óner ıesi jańa maýsymnyń premerasy ótetin kúni óziniń týǵan kúnin atap ótedi.
Mádenıet aptalyǵy 9 qazanda Aqmola oblystyq orys drama teatrynyń 50-shi mereıtoılyq maýsymynyń saltanatty ashylýymen qorytyndylanady.
Kórermen nazaryna Muhtar Áýezovtiń shyǵarmasy negizinde sahnalanǵan «Lıýtyı» dramasy usynylady. Qoıylymnyń rejısseri – Tımýr Kýlov, kompozıtory – Batyrhan Sabyr.
Saltanatty keshke elimizdiń tanymal mádenıet jáne kıno qaıratkerleri – Merýert Ótekeshova, Ashat Maemırov, Gúlsına Merǵalıeva jáne Asylhan Tólepov shaqyrylǵan.
Mádenıet aptalyǵy óńirlik shyǵarmashylyq ujymdardyń kásibı áleýetin keńinen tanytyp, olardyń elimizdiń rýhanı damýyna qosyp otyrǵan úlesin kórsetýge múmkindik beredi. Sonymen qatar shara ulttyq óner dástúrleriniń zamanaýı sahnalyq ónermen sabaqtastyǵyn aıqyndaı túsedi.
