Kókshetaýda ulttyq dombyra kúnine oraı 2500 dombyrashy bir mezette kúı tartty
KÓKShETAÝ. KAZINFORM — Kókshetaýda Ulttyq dombyra kúnine oraı «Kıeli dombyra» oblystyq fleshmob ótip, onda 2500 jýyq dombyrashy bir mezette Qurmanǵazynyń «Balbyraýyn», «Saryarqa», «Adaı» jáne Abylaı hannyń «Shańdy joryq» kúılerin oryndady.
«Oqjetpes» stadıonynda uıymdastyrylǵan aýqymdy sharaǵa Úkili Ybyraı atyndaǵy Aqmola oblystyq fılarmonııasy, «Kókshetaý» mádenıet saraıy, M.Jumabaev atyndaǵy Aqmola oblystyq ǵylymı ámbebap kitaphanasy, Oblystyq halyq shyǵarmashylyq jáne mádenı demalys ortalyǵy, Aqmola oblystyq tarıhı-ólketaný, Kókshetaý qalasy tarıhy, Málik Ǵabdýllın, Ádebıet jáne óner mýzeıleri, Tarıhı murany qorǵaý jáne paıdalaný ortalyǵynyń qyzmetkerleri, Kókshetaý qalasy «Dostar» mádenıet saraıynyń shyǵarmashylyq ujymdary, sonymen qatar, Birjan sal, Aqkól, Arshaly, Atbasar, Býrabaı, Jaqsy, Ereımentaý, Esil, Jarqaıyń, Zerendi, Shortandy, Tselınograd aýdandary men Kókshetaý qalasynyń bilim jáne mádenıet oshaqtary, Memlekettik shyǵarmashylyq tapsyrys qatysýshysy — «Shabyt» bilim jáne shyǵarmashylyq ortalyǵy tárbıelenýshileri, Aqmola oblystyq soty, memlekettik organdar, Aqmola oblysy densaýlyq saqtaý basqarmasynyń qyzmetkerleri men qala turǵyndary qatysty.
Barlyǵy 2500-ge jýyq dombyrashy bir mezette Qurmanǵazynyń «Balbyraýyn», «Saryarqa», «Adaı» jáne Abylaı hannyń «Shańdy joryq» kúılerin oryndap, kópshilikti tánti etti.
Sharada Aqmola oblysy mádenıet basqarmasynyń basshysy Aıgúl Sábıtova aımaq basshysy Marat Ahmetjanovtyń atynan jınalǵandardy quttyqtap, ulttyq ónerdi nasıhattap júrgen aqmolalyqtarǵa alǵys bildirdi.
«Dombyra degenimiz — jaı ǵana aspap emes, ol babalarymyzdan qalǵan asyl mura, ár qazaqtyń rýhy men jany. Án men kúıdiń besigi sanalatyn arqa tóri Aqmola óńiri úshin bul merekeniń orny erekshe. Qazaq tarıhynyń óner áleminde tanymal Qurmanǵazy, Dáýletkereı, Táttimbet, Mahambet, Dına, Súgir, Qazanǵap syndy kúı qyrandarynyń jolyn ustanǵan urpaqtar, kúı óneriniń darabozdary, kúıshi-dombyrashylar kúni búgin de ǵasyrdan ǵasyrǵa ulasqan babalar dástúrin jalǵastyrýda», — dedi basqarma basshysy óz sózinde.
Aqmola oblysy mádenıet basqarmasynyń málimetinshe, búgingi tańda Aqmola oblysynda 24 folklorlyq ansambli bar (qatysýshylar sany — 345), 30-dan astam dástúrli ánshi, 10 qazaq ulttyq aspaptar orkestri (qatysýshylar sany — 275), 12 dombyra úıirmesi bar (qatysýshylar sany — 212), memlekettik shyǵarmashylyq tapsyrys boıynsha 6 tegin úıirme (qatysýshylar sany — 700) jumys isteıdi.
Aıta ketsek, budan buryn Kókshetaýda vokaldy-aspaptyq ansamblder men kaver toptar arasynda Aqmola oblysynyń 85 jyldyǵyna arnalǵan «Sálem, Kókshetaý!» oblystyq baıqaý-festıvali ótkenin jazǵan edik.
