Kókshetaýda turǵyn úı aýlalary qalpyna keltirilýde (FOTO)

KÓKShETAÝ. QazAqparat - Búgin oblys ákimi Sergeı Kýlagın Kókshetaýdaǵy biraqtar kósheler men úı aýlalaryn abattandyrý jumystarymen tanysty. Sondaı-aq, óndiris oryndarynda da boldy. Bul týraly oblys ákiminiń baspasóz qyzmetinen habarlady.

Qala ákimi E.Marjyqpaevtyń aıtýynsha bıylǵy maýsymda on shaqty turǵyn úıdiń aýlasyn abattandyrý josparlanǵan. Onyń ishinde Abylaı han dańǵylyndaǵy ótken jyly jóndeý jumystary júrgizilgen № 30 kópqabatty turǵyn úıdiń aýlasy qorshalatyn bolady.

Qazirgi kezde qurylys jumystaryn «Injener Dor Proekt» JShS qolǵa alyp, 12 mıllıon teńgege jóndeýde. Úıdiń kire berisinen bastap Abylaı han dańǵylyna deıin trotýarlar qalpyna keltirilip, beder tastar tóselýde.

Atalǵan jumystardyń barysymen tanysqan aımaq basshysy sońǵy 3 jyl qatarynan Kókshetaý qalasynda turǵyn úı aýlalaryn qalpyna keltirilip jatqanyn atap ótti.

«Barlyǵyn qalpyna keltirý qajet. Qalany abattandyrýǵa qarajat qarastyramyz. Odan ári turǵyn úı aýlasy, gazgolderler jáne lıfti sharýashylyǵyna kóńil bóletin bolamyz», dedi S.Kýlagın.

Sonymen qatar oblys ákimi qala basshylyǵyna kúrdeli jóndeý jumystary júrgiziletin úılerdiń turǵyndarymen tyǵyz baılanysta jumys isteýdi tapsyrdy. Turǵyndar senbilikke, kógaldandyrý jumystaryna belsendi qatysa alady.

Osy kúni aımaq basshysy Kókshetaýdaǵy «Qazaqstan Agro Innovatsııalyq korporatsııasy» JShS jáne «Kókshetaý mıneraldy sýlary» AQ tárizdi biraqtar óndiris oryndarynyń jumysymen de tanysty.