Kókshetaýda turǵyn úı salmaq bolǵan merdiger 211 mln teńgeni urlap ketken
KÓKShETAÝ. KAZINFORM – QMA Aqmola oblysy boıynsha departamenti prokýratýranyń úılestirýimen Kókshetaý qalasyndaǵy qurylys jobalaryn iske asyrý kezinde bıýdjet qarajatyn jymqyrý faktisi boıynsha tergep-tekserý júrgizip jatqanyn habarlady.
2021 jylǵy jeltoqsanda Kókshetaý qalasynyń qurylys bólimi MM men «Aıdana-IK» JShS arasynda áleýmettik osal toptarǵa arnalǵan kóppáterli turǵyn úı salý jóninde 1 mlrd teńgeden asatyn somaǵa kelisimshart jasalǵan. Merdiger avanstyq tólemderdi alý úshin azamattyq-quqyqtyq jaýapkershilikti saqtandyrý boıynsha jalǵan sharttardy usynǵan.
Keıin tapsyrys berýshi tarapynan JShS-ne 211 mln teńge kólemde qarajat aýdarǵan. Alaıda qurylys jumystary tolyq kólemde oryndalmaǵan. Nátıjesinde nysandar paıdalanýǵa berilmegen. Alynǵan bıýdjet qarajaty jeke qajettilikterge, kontragenttermen esep aıyrysýǵa, sondaı-aq qolma-qol aqshaǵa aınaldyrylýǵa jumsalǵan.
Kúdikti qamaýǵa alyndy. Tergep-tekserý jalǵasyp jatyr.
Qazaqstan Respýblıkasy QPK-niń 201-babyna sáıkes ózge aqparat jarııalaýǵa jatpaıdy.
SQO-da bóget salǵan merdigerge tıisti qujatsyz 1 mlrd astam teńge tólem jasalǵanyn jazǵan edik.
