Kókshetaýda túnde jappaı tóbeleske qatysqan 6 jigit ustaldy

KÓKShETAÝ. QazAqparat - Kókshetaýda túnde jappaı tóbelesken jastar ustaldy, dep habarlaıdy QazAqparat tilshisi.

Aqmola oblystyq polıtsııa departamenti baspasóz qyzmetiniń málimetinshe, tóbeles maýsymnyń 5-de túngi saǵat 05:20 shamasynda oblys ortalyǵyndaǵy oıyn-saýyq mekemesiniń mańynda bolǵan.

Ol Kókshetaý qalalyq polıtsııa basqarmasy jedel basqarý ortalyǵynyń beınebaqylaý kamerasyna túsip qalǵan.

«Jappaı tóbeles týraly málimet dereý búkil avtopatrýlder men polıtsııaǵa joldandy. Oqıǵa ornyna jetken tártip saqshylary 34, 29, 26 jáne 25 jas aralyǵyndaǵy alty er adamdy ustady», - dedi vedomstvodan.

Anyqtalǵandaı, jastar ózara sózge kelip, keıin janjal jappaı tóbeleske ulasqan.

Osyǵan baılanysty Qylmystyq kodekstiń 293-baby 2-bóligi boıynsha sotqa deıingi tergeý sharalary júrip jatyr.

Aıta keteıik, osyǵan deıin Qosshyda eresek adam 10 jasar balany urǵan bolatyn.