Kókshetaýda tórt jasar bala 2-qabattan qulap ketti
KÓKShETAÝ. QazAqparat - Kókshetaýda aǵasymen birge qalǵan tórt jasar bala ekinshi qabattaǵy páterdiń terezesinen qulap ketti, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.
Vedomstvonyń málimetinshe, 20 mamyrda ekinshi qabattyń terezesinen balanyń qulap ketkeni týraly habarlama tústi.
«Tórt jasar bala 10 jasar aǵasymen úıde jalǵyz qalǵan. Osy kezde ata-anasy emhanaǵa ketken. Úlken aǵasy jýyný bólmesinde bolǵan kezde, bala ózdiginen terezege kóterilip, baıqaýsyzda terezeden qulap ketti. Qulaǵan balanyń jaǵdaıy turaqty, dene synyqtary men jaraqattary joq», - dep atap ótti vedomstvodan.
Eske sala ketsek, bıylǵy jylǵy 14 mamyrda Kókshetaýda jetinshi qabattyń terezesinen eki jasqa taıaǵan bala qulap ketken bolatyn. Ol jedel járdem brıgadasy kelgenshe kóz jumdy.
