Kókshetaýda tórt úıdiń shatyry julynyp, 10 aıaldama zaqymdandy
KÓKShETAÝ. QazAqparat – Kókshetaý qalasynda qaty jeldiń saldarynan birneshe ǵımarat pen nysan búlindi, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasap.
Vedomstvonyń málimetinshe, búgin soqqan qatty jelden Kókshetaý qalasynda 4 turǵyn úıdiń shatyryna (onyń 2-i ákimshilik ǵımarat), 10 aıaldama pavılonyna jáne 4 jarnama nysanyna zaqym kelgen.
Sonymen qatar, Krasnoıar kentinde 1 turǵyn úıdiń shatyryn ushyryp, Stantsıonnyı kentinde 1 avtobýs aıaldamasy qulaǵan.
«Kókshetaý qalasynyń Shevchenko, Temirbekov, Áýezov kósheleri, Barmashıno aýdany jáne Kóz ortalyǵy sharshy aýmaǵyndaǵy elektr taratqysh jelilerge zaqym keldi. Qazirgi kezde qalalyq elektr jelisiniń 25 adam jáne 8 tehnıkadan turatyn brıgadasy elektrmen jabdyqtaý júıesin qalpyna keltirý jumystaryn júrgizýde», - deıdi qalalyq ákimdiktiń baspasóz qyzmetindegiler.
Vedomstvodan atap ótkendeı, qalalyq kommýnaldyq qyzmetter, Kókshetaý TJB qyzmetkerleri tabıǵat apatynyń zardaptaryn joıýǵa kiristi. Buǵan qalalyq qyzmetterden 181 adam, 8 arnaıy tehnıka, Kókshetaý qalalyq TJB jeke quramynan 20 adam jáne 3 arnaıy tehnıka jumyldyrylyp otyr.
Aıta keteıik, osyǵan deıin habarlaǵanymyzdaı, Kókshetaýda jel kópqabatty turǵyn úıdiń shatyryn ushyryp áketken bolatyn.
