Kókshetaýda tórt kólikti zaqymdaǵan 17 jastaǵy bozbala ustaldy
KÓKShETAÝ. KAZINFORM – Kókshetaýda birneshe avtokólikti soǵyp, oqıǵa ornynan qashyp ketken 17 jastaǵy bozbala jaýapqa tartylady.
Ekshn fılmderden kem emes oqıǵa Kókshetaýda 22 sáýir kúni bolǵan. Aqmola oblysy polıtsııa departamenti baspasóz qyzmetiniń málimetinshe, tańerteń erte «102» jelisine jergilikti turǵyn habarlasyp, «Syrymbet» saýda úıine qarama-qarsy ornalasqan Tsentralnyı shaǵyn aýdanynda belgisiz júrgizýshi onyń «Haval» markaly kóligin soǵyp ketkenin aıtty. Jol-kólik oqıǵasynan keıin quqyq buzýshy oqıǵa ornynan qashyp ketken.
– Jedel basqarý ortalyǵynyń ınspektorlary beınebaqylaý kameralary arqyly kóliktiń baǵytyn anyqtap, patrýldik polıtseılerdi baǵdarlady. Nátıjesinde «Haval H6» markaly avtokólik kóshe qıylystarynyń birinde baıqaldy. Júrgizýshi baǵdarsham belgilerin elemeı, qyzyl túske ótip, júrginshilerge qaýip tóndirdi jáne kóp uzamaı «VAZ 2199», «Rav 4» jáne «Mercedes» markaly avtomobıldermen soqtyǵysty. Oqıǵa saldarynan jaraqat alǵandar joq, - dedi vedomstvo ókilderi.
Esirgen kólik júrgizýshisi Saryarqa shaǵyn aýdanyndaǵy 25/7 úıdiń janyndaǵy baǵanǵa soǵylyp baryp toqtady. Ol kólikti tastaı qashyp, jaıaý jasyrynýǵa tyrysty. Jigitti polıtsııa tehnıkalyq lıtseıdiń janynda ustady.
Jurtty ábigerge salyp, birneshe avtokólikti zaqymdaǵan jergilikti kolledjderdiń biriniń 17 jastaǵy stýdenti bolyp shyqty. Medıtsınalyq kýálandyrý onyń jeńil dárejede mastyǵyn kórsetti.
– 17 jastaǵy bozbalanyń ata-anasyna qatysty QR ÁQBtK 440-babynyń 2-bóligi (alkogoldik ishimdikterdi ishý nemese qoǵamdyq oryndarda mas kúıinde bolý) jáne 442-babynyń 2-bóligi (kámeletke tolmaǵan balanyń zańdy ókilderiniń erip júrýinsiz túngi ýaqytta turǵyn úıden tys jerde bolýy) boıynsha ákimshilik hattamalar jasaldy. Sondaı-aq polıtseıler kámeletke tolmaǵan adamnyń basqa bireýdiń kóligin qalaı minip ketkenin de anyqtaıdy. Tekserý qorytyndysy boıynsha barlyq tıisti shara qabyldanady, - dedi polıtsııa qyzmetkerleri.
Buǵan deıin Almatyda jol erejesin buzǵan tanymal blogerdiń jazalanǵanyn jazǵan edik.