Kókshetaýda toqtap qalǵan turǵyn úı kesheniniń qurylysy jandandy
KÓKShETAÝ. QazAqparat - Kókshetaýda «Otaý Qurylys» JShS qurylys kompanııasy úleskerlerge salynyp jatqan turǵyn úı keshenindegi jumystardy jandandyrdy, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Vedomstvonyń málimeti boıynsha, qazirgi kezde qurylys-montajdaý jumystary jandanyp, jetkizip berýshi men merdigerdiń nesıelik qaryzdary qaıtarylyp jatyr, sondaı-aq, qurylys materıaldardyń aqysy da óteldi.
Eske sala keteıik, kókshetaýlyqtar neke saraıyna qarama-qarsy ornalasqan Otaý city turǵyn úı kesheni qurylysynyń toqtap qalaǵany týraly máseleni birneshe kótergen edi. Naqtyraq aıtqanda, turǵyn úı qurylysynyń sozylýy jáne úlesker salǵan qarjynyń saqtalýy tolǵandyrdy. Jaqynda tikeleı efır arqyly ótken «Ákim saǵaty» baǵdarlamasynda osy saýal aımaq basshysy Málik Myrzalınge qoıyldy.
Kelesi kúni aımaq basshysy «Otaý Qurylys» JShS ókilderimen kezdesip, jumys barysy týraly surap bildi. Merdigerlerge qurylys jumystaryn saǵyzdaı sozbaı, kelisimsharttaǵy mindettemelerdi qatań saqtaý qajettigin aıtty.
Óz kezeginde merdigerler aımaq basshysyna bergen ýádesinde turyp, qurylys alańyndaǵy jumystardy 2018 jyldyń 1-shi qarashasynan bastap jandandyrdy. Turǵyn úı kesheniniń qurylysyn aıaqtaý 2019 jyldyń sońyna josparlanyp otyr.
