Kókshetaýda toǵyzqumalaqtan Qazaqstan chempıonaty ótti
KÓKShETAÝ. QazAqparat - Kókshetaýda toǵyzqumalaqtan Qazaqstan chempıonaty ótti, dep habarlaıdy QazAqparat tilshisi.
Aqmola oblysynyń dene shynyqtyrý jáne sport basqarmasy baspasóz qyzmetiniń málimeti boıynsha, jarysqa elimizdiń 12 óńirinen jınalǵan 100-ge jýyq toǵyzqumalaqshy qatysty.
«Olardyń arasynda 1 eńbegi sińgen sport sheberi, 4 - halyqaralyq dárejedegi sport sheberi, 13 - QR sport sheberi bar. Birneshe kúnge sozylǵan ıntellektýaldy jarys eki topta aınalý júıesi boıynsha ótti», - deıdi Aqmola oblysynyń dene shynyqtyrý jáne sport basqarmasy baspasóz hatshysy Mahabbat Bolshına.
Uıymdastyrýshylardyń aıtýynsha, «dala shahmaty» sanalatyn qazaq halqynyń ulttyq oıyndarynyń biri - toǵyzqumalaqqa sońǵy kezderi jastardyń qyzyǵýshylyǵy artyp keledi. Ótken jyly jarystyń respýblıkalyq kezeńine barlyǵy 7 komanda ǵana qatysqan bolsa, bıyl elimizdiń 12 óńirinen jınaldy.
