Kókshetaýda TQS jumysshysy klıentiniń kóligin aıdap áketken
KÓKShETAÝ. QazAqparat – Kókshetaýda tehnıkalyq qyzmet kórsetý ortalyǵy aýmaǵynan «Land Krýzer» markaly jol talǵamaıtyn kólikti aıdap áketken kúdikti ustaldy, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.
Vedomstvonyń málimetinshe, kóliginiń joǵalǵany týraly onyń ıesi shildeniń 22-de Kókshetaý qalalyq PB kezekshilik bólimine habarlasqan. Zardap shegýshiniń sózinshe, jóndeýge qaldyrylǵan «Land Krýzer» markaly jol talǵamaıtyn kóligin oblys ortalyǵyndaǵy TQS aýmaǵynan aıdap áketken.
«Polıtsııa dereý kólikti izdestirý sharasyn qolǵa aldy. Tártip saqshylary beınebaqylaý kamerasyndaǵy jazbany zerttep, TQS jumysshylary men klıentterinen túsinikteme aldy. Shildeniń 22-de osy qylmysqa qatysty atalmysh TQS jumysshysy, 22 jastaǵy jergilikti turǵyn ustaldy», dep atap aıtty vedomvsto ókilderi.
Qazirgi kezde, kúdiktiniń ústinen QR QK 200 baby (kólik urlaý) boıynsha is qozǵalyp, sotqa deıingi tergeý amaldary júrgizilýde. Avtokólik zańdy ıesine qaıtaryldy.
