Kókshetaýda tegin jol júrý quqyǵy bar azamattardyń tizimi keńeıtildi
KÓKShETAÝ. KAZINFORM — 2026 jylǵy 3 aqpannan bastap Kókshetaý qalasynyń qoǵamdyq kólikterinde II jáne III toptaǵy múgedektigi bar adamdar da tegin júre alady, dep habarlaıdy Kazinform agenttiginiń tilshisi.
Oblys ortalyǵy ákimdiginiń málimetinshe, Aqmola oblysy Kókshetaý qalasy ákimdiginiń qaýlysy men Kókshetaý qalalyq máslıhatynyń «Taksıden basqa qoǵamdyq kólikte Kókshetaý qalasynyń jekelegen sanattaǵy azamattary úshin jolaqy tóleý boıynsha jeńildikter belgileý týraly» sheshimine sáıkes, qoǵamdyq kólikte jeńildikpen jol júrý quqyǵy azamattardyń 16 sanatyna beriledi.
Olardyń qatarynda Uly Otan soǵysynyń qatysýshylary men múgedekteri, qorshaýdaǵy Lenıngrad turǵyndary, fashıstik lagerlerdiń burynǵy tutqyndary, kópbalaly ári az qamtylǵan otbasylardan shyqqan mektep jasyndaǵy balalar, on alty jasqa deıingi múgedek balalar, Kókshetaý qalasynyń Qurmetti azamattary, Aýǵanstandaǵy soǵys qımyldarynyń qatysýshylary men múgedekteri jáne basqa da sanattar bar.
«Qala turǵyndary men qoǵamdyq birlestikterdiń usynystary boıynsha jeńildikke ıe sanattardyń tizimi keńeıtilip, aýrý túrine qaramastan II jáne III toptaǵy múgedektigi bar adamdar engizildi. Olarǵa qoǵamdyq kólikte tegin jol júrý múmkindigi beriledi», dep atap ótti ákimdikte.
II jáne III toptaǵy múgedektigi bar barlyq kókshetaýlyqtarǵa 2026 jylǵy 3 aqpannan bastap qoǵamdyq kólikte tegin jol júrý quqyǵy beriledi.
Sondaı-aq ákimdikte jeńildik beriletin kólik kartasyn alý tártibi túsindirildi. Ol úshin aldymen Kókshetaý qalasynyń jumyspen qamtý jáne áleýmettik baǵdarlamalar bólimine baryp, jeńildikke quqyq beretin múgedektik týraly anyqtama alý qajet. Odan keıin alynǵan anyqtama elektrondyq bılettendirý júıesiniń operatory — «KoksheBusTolem» JShS-ne usynylady. Sol jerde azamatty sýretke túsirip, jeńildik beriletin kólik kartasy rásimdeledi.
Buǵan deıin Kókshetaýda zeınetkerlerdiń avtobýstarda tegin júretini habarlanǵan. Kókshetaý qalasynyń zeınetkerleri úshin qoǵamdyq kólikte tegin jol júrý 2025 jylǵy 1 qańtardan bastap engizildi. Sondaı-aq sheneýnikter zeınetkerlerge osy jeńildikti alý úshin qujattardy qalaı durys rásimdeý kerektigin túsindirgen edi.
Sondaı-aq Aqmola oblysynda múgedektigi bar adamdardy jumyspen qamtý kvotasy ulǵaıǵanyn jazdyq.