Kókshetaýda táýlik boıy tolassyz jaýǵan jańbyr halyqty ábigerge salýda
KÓKShETAÝ. QazAqparat - Kókshetaýda táýlik boıy tolassyz jaýǵan jańbyr halyqty ábigerge salýda. Bul týraly óńirdegi QazAqparat tilshisi habarlaıdy.
Shildeniń bel ortasynan bastalǵan jaýyn-shashyn bir tolastar emes. Keshe keshkisin bastalǵan nóser onsyz da mazasy ketken kókshetaýlyqtardy odan saıyn ábigerge saldy. Ásirese, tolassyz jaýǵan jańbyrdyń saldarynan oblys ortalyǵyndaǵy kóppáterli turǵyn úılerdiń tóbesinen sý aǵýda. Zardap shekkenderdiń qatarynda jaqynda ǵana jóndeý jasaǵan turǵyndar da bar kórinedi.
Tipti, qalanyń ortalyq kósheleriniń sýdyń astynda qalýyna baılanysty kólik qatynasyna shekteý qoıyldy. Gorkıı men Sovetskaıa kóshesiniń qıylysynda sýdyń deńgeıi tizeden keledi. Bul jerlerde TJD qyzmetkerleri sý sorý jumystaryn júrgizýde. Sondaı-aq, Shanhaı jáne Jaılaý shaǵynaýdandarynda jekemenshik úılerge de sý ketkeni belgili boldy.
Sınoptıkterdiń boljamy boıynsha, jaqyn kúnderi aýa raıynyń jyly qabaq tanytatyn túri joq. Kerisinshe, erteń jyldamdyǵy 15-20 metrge deıin jel turyp, kún kúrkirep, jaýyn jaýady dep kútilýde.
