Kókshetaýda taǵy bir qarjy pıramıdasynyń joly kesildi
KÓKShETAÝ. QazAqparat - Kókshetaýda taǵy bir qarjy pıramıdasynyń joly kesildi, dep habarlaıdy QazAqparat tilshisi.
Oblystyq ІІD-niń baspasóz qyzmetiniń málimeti boıynsha Kókshetaý qalalyq ІІB tarapynan jergilikti JK-nyń (jeke kásipker) quryltaıshysy 31 jastaǵy kókshetaýlyqtyń ústinen QR QK 217-babynyń 2-bólimi boıynsha sotqa deıingi tergeý amaldary júrgizilýde. Qazirdiń ózinde oblys ortalyǵynyń 45 turǵyny polıtsııaǵa shaǵym túsirgen.
«Polıtseıler anyqtaǵandaı JK jelilik marketıng sııaqty bir aıǵa jýyq ýaqyt jumys istegen. Quryltaıshy Kókshetaý qalasynyń turǵyndaryn joǵary dıvıdentke sendirip, aqshalaryn alyp otyrǵan. Turǵyndar 30 000 teńge aqsha salsa, 30 kún ótken soń salǵan aqshalary 3 esege kóbeıýge tıis bolatyn. Eger salymshy taǵy bir kisini ertip ákelse, onda oǵan ár adam úshin «bonýs» retinde 30 myń teńge kóleminde syıaqy tólenedi.
Alaıda, zardap shegýshilerdiń aıtýynsha, JK ózin bankrot dep tanypty. Osynyń saldarynan turǵyndardyń salǵan aqshalary qaıtarylmaı qalǵan.
Qazirgi kezde kúdikti ýaqytsha ustaý abaqtysyna toǵytyldy. Sondaı-aq, arnaıy tergeý toby qurylyp, zardap shekkender men kýágerlerden túsinikteme alýda. JK qujattaryn zerttep, tekserýde», túsindirdi baspasóz qyzmetindegiler.
