Kókshetaýda sýpervaızer saýda úıiniń taýaryn tegin taratyp jibergen
KÓKShETAÝ. QazAqparat – Aqmola oblysynda sýpervaızer saýda úıiniń 1 mln teńgelik taýaryn tegin taratyp jibergen, dep habarlaıdy QazAqparat tilshisi oblystyq Polıtsııa departamentine silteme jasap.
Vedomstvonyń málimetinshe, Kókshetaý qalasynyń polıtsııa basqarmasyna oblys ortalyǵyndaǵy iri saýda oryndarynyń biriniń ákimshisi aryzdanǵan. Onyń aıtýynsha, saýda úıiniń 30 jastaǵy sýpervaızeri ózine senip tapsyrylǵan 1 mln teńgeden astam taýardy ıemdenip alǵan.
«Belgili bolǵandaı, kúdikti saýda úıinen satý úshin jalpy somasy 2 mln teńgege taýardy qaryzǵa alǵan. Keıin, onyń bir bóligin tanystary men beıtanys adamdarǵa tegin taratyp jibergen. Qazirgi kezde, tegin taratylǵan taýarlar Qazaqstannyń ózge óńirlerinen anyqtaldy. Osy oqıǵaǵa baılanysty QR QK-niń 189-baby 1-bóligi boıynsha sotqa deıingi tergeý amaldary júrgizilýde», - dedi departamentten.
Aıta keteıik, atalǵan sanktsııa boıynsha kúdikti 3 jylǵa deıingi merzimge sottalýy múmkin. Ustalǵan azamatqa «kelý týraly mindetteme» bultartpaý sharasy qoldanyldy.
